( ರಾಗ ಶ್ರೀ ಆದಿತಾಳ)

ಪುಂಡರೀಕವರದ ಪಂಢರಿರಾಯನ ಕೇಳವ್ವ ಕೇಳೆ || ಪ||

ಗೋಕುಲದೊಳಗೆ ತಾನಿಪ್ಪ, ಮೂರು ಲೋಕಕೆ ತಾನಪ್ಪ
ಕೊಳಲ ಧ್ವನಿಯ ಮಾಡುತಲಿಪ್ಪ, ನಮ್ಮ ತುರುಗಳ ಕಾಯುತಲಿಪ್ಪ ||

ವೃಂದಾವನದೊಳು ನಿಂದ, ನಂದನಕಂದ ಗೋವಿಂದ
ಕೊಳಲ ಧ್ವನಿ ಬಹು ಚಂದ, ಮೂಜಗವ ಪಾಲಿಪ ಮುಕುಂದ ||

ಸುರತರುವಿನ ನೆರಳಲ್ಲಿ, ಇವನ ಹೆಗಲಿನ ಮೇಲೆ ಕೊಡಲಿ
ನೆರೆದಿಹ ಗೋಪಿಯರಲ್ಲಿ, ಗೋಪಾಲರಾಡುತ ಲೀಲೆಗಳಲ್ಲಿ ||

ಕರ್ಪೂರ(ದ) ವೀಳ್ಯವ ಮೆಲುವ, ನಮ್ಮ ಕಸ್ತೂರಿತಿಲಕ ಉಂಗುರವ
ಮುತ್ತಿನ ಓಲೆ ವರಚೆಲುವ, ವಿಸ್ತರದಿ ಹದಿನಾಲ್ಕು ಲೋಕ ಪೊರೆವ ||

ಹಿಮಕರಚರಣದ ಕರನ, ಮೂಜಗ ಪಾಲಿಪ ಕರುಣ
ಅಮರರಿಗೆ ಒಲಿದವನ, ನಮ್ಮ ಪುರಂದರವಿಠಲರಾಯನ ||