( ರಾಗ ಶಂಕರಾಭರಣ. ಆದಿ ತಾಳ)

ಹರಿ ಹರಿ ಹರಿಯೆಂದು ಸ್ಮರಿಸುವ ಜನರಿಗೆ
ದುರಿತವೆತ್ತಣದು ದುರ್ಗತಿಯೆಲ್ಲಿ ಬಹುದು ||ಪ||

ಸ್ನಾನವೇತಕೆ ಸಂಧ್ಯಾಜಪತಪವೇತಕೆ
ಮೌನವೇತಕೆ ಮೇಲೆ ವ್ರತವೇತಕೆ
ಮಾನಸದಲಿ ವಿಷ್ಣುಪದ ಧ್ಯಾನಿಸುವ ಮಹಾ-
ಜ್ಞಾನಿಗಳ ಸಂಗಸುಖದೊಳಿರ್ಪರಿಗೆ ||

ಯಾತ್ರೆಯೇತಕೆ ಕ್ಷೇತ್ರತೀರ್ಥಂಗಳ ಮಾಡಲೇಕೆ
ಗೋತ್ರಧರ್ಮದ ಪುಣ್ಯಫಲವೇತಕೆ
ಸೂತ್ರದಿಂ ಜಗವ ಮೋಹಿಸುವ ಮುರಾರಿಯ
ಸ್ತೋತ್ರದಿಂ ಪೊಗಳಿ ಹಿಗ್ಗುವ ಭಾಗವತರಿಗೆ ||

ಅಂಗದಂಡನೆಯೇಕೆ ಆತ್ಮಘಾತದ ಒಂದು
ತಿಂಗಳ ಚಾಂದ್ರಾಯಣವು ಏತಕೆ
ಮಂಗಳಮೂರುತಿ ಪುರಂದರವಿಠಲನ್ನ
ಹಿಂಗದೆ ಅರ್ಚನೆ ಮಾಡುವ ಭಕುತರಿಗೆ ||