ಇದೀಗ ಭಕುತಿಯು ಮತ್ತಿದೀಗ ಭಕುತಿಯು

(ರಾಗ ದೇಶಿಕತೋಡಿ ರೂಪಕತಾಳ)

ಇದೀಗ ಭಕುತಿಯು ಮ-
ತ್ತಿದೀಗ ಭಕುತಿಯು ||ಪ||
ಮಧುದ್ವಿಷನ ಪದಕಮಲಕೆ
ಮಧುಪನಂತೆ ಮುದದಿ ವಂದಿಪಡೆ ||ಅ||

ಶ್ರೀಕಾಂತಮೂರುತಿ ಬಾಹ್ಯಾಂತರದಿ
ಏಕಾಂತದಿ ನಿನಗಾನಂದ ತುಳುಕಾಡಿ
ಮುಖವಿಕಾಸದಿ ತನುವ ಮರೆತು
ಏಕಭಾವ ಬುದ್ಧಿಲಿ ಕುಣಿವ ||

ದಂಭವ ಸಾರುವುದತ್ತತ್ತ ಜರಿದು
ಕುಂಭಕ ಪೂರಕ ರೇಚಕ ನೀನದು
ಅಂಬುಧೀಶ ಪದಾಂಭುಜ ವೀಕ್ಷಿಸಿ
ಬಿಂಬವ ಕಾಣುವ ಹಂಬಲ ಹಿಡಿವ ||

ಕಂಡವರ ಕಾಲಿಗೆ ಕುಮನುಜರಿಗೆ
ಮಂಡೆಯ ಬಾಗದೆ ಪರೇಶ ಕೊಟ್ಟಷ್ಟು
ಉಂಡು ಸುಜನರ ಕಂಡು ಸುಖಿಸಿ ಪಾ-
ಷಂಡ ಸಂಭಾಷಣೆ ಸೋಕದೆ ಬಾಳುವ ||

ತಪತಾರಿ ಕಂಬುಲಾಂಛನ ಪಿಡಿದು
ಗುಪಿತಮಂತ್ರವ ವರಗುರುಗಳ
ಉಪದೇಶಕ್ರಮ ಮೀರದೆ ಇತರ
ಕಪಟ ಬಿಟ್ಟು ನಲಿದು ಸುಖಿಪ ||

ಸದ್ಭಕ್ತಿ ಸದ್ಧರ್ಮ ಮಾಡುತ ನೋಡುತ
ಸದ್ಗೋಷ್ಠಿ ಸಚ್ಛಾಸ್ತ್ರ ಹೇಳುತ ಕೇಳುತ
ದುಗ್ಧಸಮುದ್ರೇಶ ಪುರಂದರವಿಠಲಗೆ
ಇದ್ದ ಸಂಪದವ ತಪ್ಪದೆ ಒಪ್ಪಿಪ ||