( ರಾಗ ಪಂತುವರಾಳಿ ಅಟತಾಳ)

ಕೂಗದೆ ಉಸಿರಿಕ್ಕದೆ, ನೀವು ,
ಬೇಗ ಬೇಗನೆ ಬನ್ನಿ , ರಂಗ ಮನೆಯ ಪೊಕ್ಕ ||ಪ||

ಸೂರಿ ಕೆಳಗೆ ನಿಂದಾರಿಸಿ ತನ್ನ
ವಾರಿಗೆಯ ಮಕ್ಕಳನು ಕೂಡಿಸಿ
ಹಾರಿ ಗೋಡೆಯ ಧುಮುಕಿ ಒಳಗೆ ಪೊಕ್ಕು
ಸೂರೆಗೊಳ್ಳುತಾನೆ ಸುಮ್ಮನೆ ಬನ್ನಿ ||

ಹೆಜ್ಜೆಗಳಿವೆ ನಮ್ಮ ಮನೆಯಲ್ಲಿ , ಕಾಲು-
ಗೆಜ್ಜೆಯ ಧ್ವನಿ ಕೇಳಿ ಬರುತಲಿದೆ
ನಿರ್ಜನರ ಕಂಡು ರಂಗ ಮನೆಯ ಪೊಕ್ಕು
ಮಜ್ಜಿಗೆಲೋಕುಳಿಯಾಡುವನಮ್ಮ ||

ಹಾಲು ಚೆಲ್ಲಿ ಹಳ್ಳ ಮುಂದೆ ಹರಿದಿದೆ
ಮೇಲೆ ಮೊಸರುಕೆನೆ ಚೆಲ್ಲಾಡಿದೆ
ಲೀಲೆ ಹೀಗೆ ಆಡುತಲೈದನೆ
ಬಾಳ ಚೋರ ಗುರು ಪುರಂದರವಿಠಲ ||