(ರಾಗ ನಾದನಾಮಕ್ರಿಯೆ ಅಟತಾಳ)

ಕೋತಿ ಹಾಗೆ ಕುಣಿದಾಡಬೇಡ
ರೀತಿಮಾರ್ಗವ ಹಿಡಿಯೆಲೊ ಮೂಢ ||ಪ||
ಆತುರ ಹಚ್ಚಿ ಕೂಗಾಡಬೇಡ
ಪಾತಕ್ಕೆ ಈ ಜನ್ಮ ಬಿದದಿರೊ ಮೂಢ ||ಅ||

ಹಳ್ಳೂರು ಕೇರ್ಯಾಗೆ ಇರುವುದು ಹಂದಿ
ನಾನಾ ಜನ್ಮವ ತಿರುಗುತ ಬಂದೆ
ಇಷ್ಟು ಸಂಸಾರವ ಮರೆಮಾಡಿಕೊಂಡೆ
ಮುಪ್ಪಿನ ಕಾಲಕ್ಕೆ ಅವಿಚಾರಗೊಂಡೆ ||

ಹೆಂಡರು ಮಕ್ಕಳು ಪ್ರಪಂಚಕ್ಕಾಗಿ
ದುಡಿದುಹಾಕಿದ್ಯೋ ಮುದಿಕೋಣನಾಗಿ
ಮಡಿದುಹೋಗುವಾಗ ದಾರಿಲ್ಲೊ ಗೂಗೆ
ನಿನ್ನೊಳು ನೀನೆ ತಿಳಿದುಕೋ ಕಾಗೆ ||

ರಾಯರು ಇರುವರು ಮದಗಜದಂತೆ
ಬಾಗಿ ನಡೀತೀರೋ ಬಿಡಿಸೂಳೆಯಂತೆ
ಇಷ್ಟು ಸಂಸಾರ ಸ್ಥಿರವಲ್ಲದಂತೆ
ಪುರಂದರವಿಠಲರಾಯ ಪದಮಾಡಿದಂತೆ ||