ಕೂಡಿ ಕೊಂಡಾಡಲೊಲ್ಲರೊ ರಂಗಯ್ಯ ನಿನ್ನ

(ರಾಗ ಕಾಂಭೋಜ ಅಟತಾಳ)

ಕೂಡಿ ಕೊಂಡಾಡಲೊಲ್ಲರೊ ರಂಗಯ್ಯ ನಿನ್ನ ||ಪ||
ಕೇಡಿಗನು ಇವ ನಮ್ಮ ಕೆಲಸ ಕೆಡಿಸುವನೆಂದು ||ಅ||

ತನ್ನ ತಾಯ ಒಡಹುಟ್ಟಿದಣ್ಣನ ಕೊಂದವನೆಂದು
ಅನ್ನಿಗರ ಬಿಡುವನೆ ಎಂದೆಲ್ಲರ್ ಮಾತಾಡಿಕೊಂಡು ||

ಹಸಿದಳುತಿರೆ ನೇವರಿಸಿ ಮೊಲೆಯೂಡಿದವಳ
ಅಸು ಹೀರಿ ಕೊಂದ ಮಾರಿ ಮಗನೆಂದು ರಂಗ ನಿನ್ನ ||

ಆವು ಕಾಯಲು ಹೋಗಿ ಹಾವಿನ ಮಡು ಧುಮುಕಿ
ಠಾವು ಬಿಡಿಸಿದವ ಕೇವಲ ಹೀನನೆಂದು ||

ಗೊಲ್ಲತೇರ ಮನೆಯಲ್ಲಿ ಪಾಲು ಮೊಸರು ಬೆಣ್ಣೆಯ
ನಿಲ್ಲದೆ ಮೆಲ್ಲುವನು ಕಳ್ಳನೆಂತೆಂದು ನಿನ್ನ ||

ತರಳ ಪುಟ್ಟನು ಎಂದು ಕರುಣದಿ ಸಲಹಿದವರ
ಬೆರಳೆಣಿಸಿ ಕೊಂದನಿವ ಪರಮಾ ಕಿತವನೆಂದು ||೫||

ಸುಲಭದಿಂದಲಿ ಬಲು ಖಳರ ಬಳಗವನೆಲ್ಲ
ಛಲದಿಂದ ಕೊಂದನಿವ ಕೊಲೆಗಾರ ರಂಗನೆಂದು ||

ಕರುಣಾನಿಧಿಯೆ ಗುರು ಪುರಂದರವಿಠಲ
ಧರೆಯ ಮಾನವರು ನಿನ್ನ ಚರಿಯ ಈ ಪರಿಯೆಂದು ||