-------ರಾಗ- ಪಂತುವರಾಳಿ (ಮಾಲಕಂಸ್) ರೂಪಕತಾಳ (ಝಪ್ ತಾಲ್)

ನೀಚನಲ್ಲವೆ ಇವನು ನೀಚನಲ್ಲವೆ ||ಪ||

ಕೀಚಕಾರಿಪ್ರಿಯನ ಗುಣವ
ಯೋಚಿಸದಲಿಪ್ಪ ನರನು ||ಅ.ಪ||

ಜನನಿ ಜನಕರಂತೆ ಜನಾ-
ರ್ದನನು ಸಲಹುತಿರಲು ಬಿಟ್ಟು
ಧನಿಕರ ಮನೆ ಮನೆಗಳರಸಿ
ಶುನಕನಂತೆ ತಿರುಗುತಿಹನು ||೧||

ಜೀವ ತಾನಕರ್ತೃವೆಂದು
ದೇವನೊಬ್ಬ ಕರ್ತೃ ರಮಾ-
ದೇವಿ ಮೊದಲುಗೊಂಡು ಹರಿಯ
ಸೇವಕರೆಂದರಿಯದವನು ||೨||

ಲೋಕವಾರ್ತೆಗಳಲಿ ಏಡ
ಮೂಕನಂತೆ ವಿಷಯಗಳವ-
ಲೋಕಿಸದಲೆ ಶ್ರೀಶಗಿವು ಪ್ರ-
ತೀಕವೆಂದು ತಿಳಿಯದವನು ||೩||

ಬಹಳ ದ್ರವ್ಯದಿಂದ ಗರುಡ
ವಾಹನನಂಘ್ರಿ ಭಜಿಸಿ ಅನು-
ಗ್ರಹವ ಮಾಡುಯೆಂದು ಬರಿದೆ
ಐಹಿಕಸುಖವ ಬಯಸುವವನು ||೪||

ಶ್ರೀಕಳತ್ರನಂಘ್ರಿ ಕಮಲ-
ವೇಕಚಿತ್ತದಲ್ಲಿ ಮನೋ-
ವ್ಯಾಕುಲಗಳ ಬಿಟ್ಟು
ಸುಖೋದ್ರೇಕದಿಂದ ಭಜಿಸುವವನು ||೫||

ಹರಿಕಥಾಮೃತವ ಬಿಟ್ಟು
ನರಚರಿತ್ರೆಯಿಂದ ದ-
ರ್ದುರಗಳಂತೆ ಹಾಳುಗೋಷ್ಠಿ
ಹರಟೆ ದಿವಸ ಕಳೆಯುತಿಹನು ||೬||

ವಿಹಿತ ಧರ್ಮ ತೊರೆದು ಪರರ
ಗೃಹಗಳಲಿ ಸಂಚರಿಸುತ
ಕುಹಕಯುಕ್ತಿಯಿಂದ ಲೋಕ
ಮಹಿತರನ್ನು ನಿಂದಿಸುವನು ||೭||

ಕರಣಜನ್ಯ ಪುಣ್ಯಪಾಪ-
ವೆರಡು ಹರಿಯಧೀನವೆಂದು
ಸ್ಮರಿಸುತ ಅತಿ ಭಕುತಿಯಿಂದ
ಹರುಷ ಪಡದಲಿಪ್ಪ ನರನು ||೮||

ವಾತಜನಕನೆನಿಪ ಜಗ-
ನ್ನಾಥವಿಠಲ ಪಾದಪದ್ಮ
ಪೋತವಾಶ್ರಯಿಸಿ ಭವ ಕು-
ವೈತರಣಿಯ ದಾಟದವನು ||೯||