(ರಾಗ ಆನಂದಭೈರವಿ ಛಾಪುತಾಳ)

ಇನ್ನೇಕೆ ಯಮನ ಭಾಧೆಗಳು , ಎನ್ನ
ಜಿಹ್ವೆಲಿ ಹರಿನಾಮಸ್ಮರಣೆ ಒಂದಿರಲು ||

ಪತಿತಪಾವನನೆಂಬೋ ನಾಮ , ಅತಿ
ಹಿತದಿಂದ ಮುನಿಗಳು ಸ್ತುತಿಸುವ ನಾಮ
ಕ್ರತುಕೋಟಿ ಫಲವೀವ ನಾಮ, ಸ-
ದ್ಗತಿಗೆ ಸಾಧನವಾಗುವ ಹರಿನಾಮ ||

ಮುನ್ನೊಬ್ಬ ಪ್ರಹ್ಲಾದ ಸಾಕ್ಷಿ, ಆ
ಕನ್ಯಾಶಿರೋಮಣಿ ದ್ರೌಪದಿ ಸಾಕ್ಷಿ
ಚಿಣ್ಣನೆಂದಜಮಿಳ ಸಾಕ್ಷಿ, ನಿಜ-
ಪುಣ್ಯಲೋಕವನಾಳ್ವ ಧ್ರುವರಾಯ ಸಾಕ್ಷಿ ||

ಹದಿನಾಲ್ಕುಲೋಕವನಾಳ್ವ , ದಿವ್ಯ-
ಮದನಜನಕನಾಗಿ ಮುದದಿಂದ ಬಾಳ್ವ
ಪದುಮನಾಭನಾಗಿ ಇರುವ , ಗುರು
ಮಧ್ವೇಶ ಪುರಂದರವಿಟ್ಠಲ ಕಾಯ್ವ ||