( ರಾಗ ಮುಖಾರಿ. ಝಂಪೆ ತಾಳ).

ಎಲೊ ಎಲೊ ಜೀವಾತ್ಮ ನೀ
ಸುಲಲಿತಾತ್ಮನ ನೆನೆದು ಸುಖಿಯಾಗೊ ಮನವೆ ||ಪ||

ಇಕ್ಷುದಂಡ ಕೈಯೊಳಿರೆ ಇಂಧನವ ಮೆಲಲೇಕೆ
ಅಕ್ಷಯ ಪಾತ್ರೆಯಿರಲು ಹಸಿದು ಇರಲೇಕೆ
ನಿಕ್ಷೇಪ ನಿಧಿಯಿರಲು ನಿರತ ದಾರಿದ್ರವೇಕೆ
ಪಕ್ಷಿವಾಹನನನಿರಲು ಪರದೈವವೇಕೆ ||

ಸುರಧೇನು ಕೈಸೇರಿ ಸುಖವಿಲ್ಲದಿರಲೇಕೆ
ಗರುಡಮಂತ್ರವ ಜಪಿಸೆ ಗರಳಭಯವೇಕೆ
ತರಣಿ ಮೊದಲುದಯಿಸಲು ಹಲವು ಜ್ಯೋತಿಗಳೇಕೆ
ಮುರಹರನ ಪೂಜಿಸದೆ ಮುಂದೆಗೆಡಲೇಕೆ ||

ಭಾವಶುದ್ಧಿ ಇಲ್ಲದಿಹ ಬಯಲ ಡಂಭಕವೇಕೆ
ದೇವತಾಂಕಿತವಿರದ ದೇಹ ತಾನೇಕೆ
ಆವಾಗ ಹರಿಯಿರಲು ಅನ್ಯ ಚಿಂತೆಗಳೇಕೆ
ಪುರಂದರವಿಠಲನ ಭಜಿಸದೆ ಕೆಡಲೇಕೆ ||