( ರಾಗ ಪೂರ್ವಿ. ಅಟ ತಾಳ)

ಕೊಬ್ಬಿರಲು ಬೇಡವೋ, ಹೇ ಮನುಜ ||ಪ ||

ಸಿರಿ ಬಂದ ಕಾಲಕೆ ಬಲು ಗರ್ವ ತೋರುತ್ತ
ಬಿರಿ ಬಿರಿ ಕಣ್ಣು ಮೇಲಕ್ಕೆ ನೋಡುವರು
ಸಿರಿ ಹೋದ ಮರುದಿನ ಬಡತನ ಬಂದರೆ
ಹುರುಕು ಕಜ್ಜಿಯ ತುರಿಸಿ ತಿರುಗುವರಯ್ಯ ||

ಒಡವೆ ವಸ್ತುಗಳಿಟ್ಟು ಬಡಿವಾರ ಮಾಡುವರು
ನಡೆಯಲಾರೆವೆಂದು ಬಳುಕುವರು
ಸಿಡಿಲು ಎರಗಿದಂತೆ ಬಡತನ ಬಂದರೆ
ಕೊಡಗಳೆರಡು ಹೊತ್ತು ನೀರ ತರುವರಯ್ಯ ||

ವ್ಯಾಪಾರ ಒಲಿದಾಗ ಕೋಪ ಅನ್ಯಾಯದಿ
ಶಾಪಕೊಂಬರು ಬಡವರ ಕೈಯ
ಶ್ರೀಪತಿ ಪುರಂದರವಿಟ್ಠಲರಾಯನೆ
ವ್ಯಾಪಾರ ಮುಗಿದರೆ ತಿರಿದುಂಬರಯ್ಯ ||