( ರಾಗ ಕಾಂಭೋಜ. ಅಟ ತಾಳ)

ಏನು ವ್ರತವೇನು ಸಾಧನಗಳೇನೊ ||
ಸ್ವಾನುಭವದಜ್ಞಾನ ಹೀನ ಮಾನವನೆ ||ಅ||

ಶಾಕವ್ರತವೆನುತ ಫಲ ಶಾಕಗಳ ಬಿಡುವಂತೆ
ಬೇಕಾದ ಆಕಾಂಕ್ಷೆ ಬಿಡಬಾರದೆ
ಸಾಕೆನಿಸಿದೆ ರತಿಗೆ ಸತತ ಮನ ಕೊಡುವಂತೆ
ಶ್ರೀಕಾಂತನೊಳು ಮನವನಿಡಬಾರದೆ ||

ನೇಮಗಳ ಮಾಡಿ ಪರಪಾಕವನು ಬಿಡುವಂತೆ
ಕಾಮ ಕ್ರೋಧಂಗಳನು ಬಿಡಬಾರದೆ
ತಾಮಸರ ಕಣ್ಣಿಂದ ನೋಡೆನೆಂಬುವ ನಿಷ್ಠೆ-
ನೇಮವನು ಪರಸತಿಯೊಳಿಡಬಾರದೆ ||

ಹೇಸಿ ದುರ್ಗಂಧಗಳಿಗೋಸರಿಸುವಂದದಲಿ
ಆಶಾಪಾಶಾದಿಗಳ ಬಿಡಬಾರದೆ
ಈಶ ಶ್ರೀ ಪುರಂದರವಿಟ್ಠಲನ ಸೇವೆಯೇ
ಲೇಸೆನುತ ಸಂತೋಷಿಸಲು ಬಾರದೆ ||