( ರಾಗ ಕಾಂಭೋಜ. ಝಂಪೆ ತಾಳ)

ಹರಿ ಹರರು ಸಮರೆಂದು ಅರಿಯದಜ್ಞಾನಿಗಳು
ಹರನ ಹೃದಯದೊಳಿರುವ ಹರಿಯ ತಾವರಿಯರು ||ಪ||

ಶರಧಿ ಮಥನದೊಳಂದು ಸಿಂಧುಸುತೆ ಬಂದಾಗ
ಹರಿ ಹರ ವಿರಿಂಚಿ ಮೊದಲಾದ ಸುರರ
ವರರಾರೆಂದು ನೋಡಿ ಶಂಕೆಯ ಬಿಟ್ಟು ಸಿರಿದೇವಿ
ಹರಿ ಸರ್ವವರನೆಂದು ಮಾಲೆ ಹಾಕಿದಳು ||

ಹರಿನಾಮ ಕ್ಷೀರವನು ಹರನಾಮ ನೀರನು
ಕ್ಷೀರ ನೀರೊಂದಾದುದಂತೆ ಇಹದು ಪರರು
ಪರ ತತ್ವವರಿಯದ ನರ ತಾನು ಹರಿಹರರು
ಸರಿಯೆಂದು ನರಕಕ್ಕೆ ಒಳಗಾಗುತಿಹನು ||

ಕ್ಷೋಣಿಯೊಳು ಬಾಣನಾ ತೋಳುಗಳ ಕಡಿವಾಗ
ಏಣಾಂಕಧರ ಬಾಗಿಲೊಳಗೆ ಇರಲು
ಕಾಣಿಪರೆ ಜನರೆಲ್ಲ ಹರಿಪರನು ತಾನೆಂದು
ಗುಣಪೂರ್ಣ ಪುರಂದರ ವಿಟ್ಠಲನು ಪರನು ||