( ರಾಗ ನಾದನಾಮಕ್ರಿಯ ಆದಿ ತಾಳ)

ಪಗಡಿ ಹಾಕೆ ಪೋರಿ
ತ್ರಿಗುಣಗಳೆಲ್ಲ ಮಾರಿ ||ಪ ||

ನೇಮದ ಸೀರೆಯನುಟ್ಟು ನಿನ್ನ
ಕಾಮದ ಕಚ್ಚೆಯ ಕಟ್ಟು
ಪ್ರೇಮದ ಸಜ್ಜನರೊಳಗೆ ನಿಂತು
ಮಾತನಾಡೋಣ ಬಾರೆ ||

ಹಿಂದಕೆ ಹೋಗಲುಬೇಡ ನೀ
ಮುಂದಕೆ ಬಂದು ನಿಲ್ಲು
ಹಿಂದಿನ ಮುಂದಿನ ಹಂಬಲ ಬಿಟ್ಟು
ಒಂದಾಟ ಆಡೋಣ ಬಾರೆ ||

ತೊಡೆಯ ತೆರೆಯಬೇಡ ನಿ-
ನ್ನೊಡೆಯನು ನಗುತಾನೆ
ತೊಡೆಯ ತೆರೆದು ತೋರಿದರೆ
ನಾಚಿಕೊಂಬರಲ್ಲೆ ||

ನೇಮ ನಿಷ್ಠೆಯ ನೀಗಿ ಅದು
ಸಾಮದಾನವಾಗಿ
ಝಾಮ ಝಾಮ ಉಸಿರು ಬಿಡದೆ
ಆಟವಾಡೋಣ ಬಾರೆ ||

ಪಗಡಿ ಎಂಬುದು ಅಲ್ಲ
ಪುಗಡಿ ಎಂಬುದು ಸೊಲ್ಲ
ಪಗಡಿ ಸೊಗಸು ಪುರಂದರ
ವಿಠಲನೊಬ್ಬ ಬಲ್ಲ ||