ಮೊನ್ನೆ ಹೀಗೆ ನಮ್ಮ ಕಕ್ಷಿದಾರನೊಬ್ಬನೊಡನೆ ಮಾತನಾಡುತ್ತಿದ್ದಾಗ ಮಾತಿನ ಮಧ್ಯದಲ್ಲಿ ತಲೆ ಎತ್ತಿದ್ದು ಈ ವಿಷಯ. ಕನ್ನಡದಲ್ಲಿ ಚಪ್ಪಲಿಗೆ ಎಷ್ಟು ಶಬ್ದಗಳಿವೆ ಎಂದು. ಆಗ ನಾವಿಬ್ಬರೂ ಕುಳಿತು ಪಟ್ಟಿ ಮಾಡಿದ ಪದಗಳು ಈ ರೀತಿ ಇವೆ:

ಚಪ್ಪಲಿ - ಕರ್ನಾಟಕದ ಎಲ್ಲಾ ಪ್ರಾಂತಗಳು (ಬಹುಶಃ ಹಿಂದಿಯ ಚಪ್ಪಲ್ ಪದದಿಂದ ಬಂದಿರಬಹುದು)
ಎಕ್ಕಡ- ಹಳೇ ಮೈಸೂರು ಪ್ರಾಂತ
ಮೆಟ್ಟು - ಮಧ್ಯ ಕರ್ನಾಟಕದ ಚಿತ್ರದುರ್ಗ ಮತ್ತು ದಾವಣಗೆರೆ ಜಿಲ್ಲೆಗಳು.
ಕಾಲುಮರಿ - ಬಳ್ಳಾರಿ ಜಿಲ್ಲೆಯ ಕೆಲವೊಂದು ತಾಲೂಕುಗಳು ಮತ್ತು ಚಿತ್ರದುರ್ಗ ಜಿಲ್ಲೆಯ ಕೆಲವು ಭಾಗಗಳು
ಮಚ್ಚಿ - ಧಾರವಾಡ ಜಿಲ್ಲೆಯ ಕೆಲವು ಭಾಗಗಳು
ಪಾದರಕ್ಷೆ - ಪತ್ರಿಕೆಯಲ್ಲಿ ಬಳಸುವ ಪದ
ಪಾದುಕೆ - ಸ್ವಾಮಿಗಳ/ದೇವರುಗಳ ಚಪ್ಪಲಿಯ ವಿಷಯದಲ್ಲಿ ಉಪಯೋಗಿಸುವ ಪದ
ಆವುಗೆ - ಹಳೆಗನ್ನಡ - ಬಹುಶಃ ಆವು (ದನ)ಗಳ ಚರ್ಮದಿಂದ ಮಾಡಿದ್ದು.
ಹಾವುಗೆ - ಎಂಬ ಶಬ್ದವೂ ಬಳಕೆಯಲ್ಲಿದೆ - ಕೆಲವೊಂದು ಸ್ವಾಮಿಗಳು ಮುಳ್ಳು ಹಾವುಗೆಯ ಮೇಲೆ ನಡೆಯುತ್ತಾರೆ!

ನಿಮ್ಮ ಪ್ರಾಂತದಲ್ಲೂ ಪಾದರಕ್ಷೆಗೆ ಪರ್ಯಾಯ ಪದವಿರಬಹುದು! ಏಕೆಂದರೆ ಕನ್ನಡದಲ್ಲಿ ಮಾತ್ರ ನಾವು ಈ ವೈವಿಧ್ಯವನ್ನು ಕಾಣಬಲ್ಲೆವು ಎನಿಸುತ್ತದೆ.