೭೮. ಶ್ರೀ ಲಲಿತಾ ಸಹಸ್ರನಾಮ ೨೮೧ರಿಂದ ೨೮೬ನೇ ನಾಮಗಳ ವಿವರಣೆ

ಶ್ರೀಧರರೆ, ಲಲಿತಾ ಸಹಸ್ರನಾಮ ೨೮೧ - ೨೮೬ರ ಸಾರ ಸಂಗ್ರಹ ಪರಿಷ್ಕರಣೆಗೆ ಸಿದ್ದ :-) ಲಲಿತಾ ಸಹಸ್ರನಾಮ ೨೮೧ - ೨೮೬ ೨೮೧. ಉನ್ಮೇಷ-ನಿಮಿಷೋತ್ಪನ್ನ-ವಿಪನ್ನ-ಭುವಾನವಲೀ  ಕಣ್ಣಿವೆಯಿಕ್ಕುವುದರೊಳಗೆ, ಸೃಷ್ಟಿ ಲಯಗಳ ಚತುರತೆ ಮಾತೆ ಕಣ್ತೆರೆವ ಉನ್ಮೇಷ ಸೃಷ್ಟಿಸಿತೆ, ಮುಚ್ಚೆ ನಿಮಿಷ ಲಯ ದೃಷ್ಟಿಸುತೆ ಬ್ರಹ್ಮದ ಇಚ್ಛಾಶಕ್ತಿ ಆಧ್ಯಾತ್ಮಿಕ ಪ್ರಜ್ಞಾ, ಸೃಷ್ಟಿಸೂಕ್ಷ್ಮ ಅನಾವರಣ ಉನ್ಮೇಷ ನಿಮಿಷೋತ್ಪನ್ನ ವಿಪನ್ನ ಭುವಾನವಲೀ ಲಲಿತಾ ಕರುಣ! ೨೮೨. ಸಹಸ್ರ-ಶೀರ್ಷ-ವದನಾ ಸಮಸ್ತ ಪ್ರಪಂಚದ ಪ್ರತಿ ಧಾತು, ಬ್ರಹ್ಮಾಂಡ ಪ್ರಜ್ಞೆಯ ತುಣುಕೆ ಅಗಣಿತ ಶಿರ ಕೈ ಕಾಲು ಮೊಗ, ನಾಸಿಕ ನೇತ್ರವೆಲ್ಲೆಡೆ ಬ್ರಹ್ಮಕೆ ಏಕಕಾಲ ಸರ್ವ ಲೋಕಪಾಲ, ನಿಭಾವಣೆ ಬ್ರಹ್ಮ ಮೇಧಾವಿತನ ಸಕಾರಾತ್ಮ ಸಹಸ್ರ ಶೀರ್ಷ ವದನ ವಾಗ್ದೇವಿಗೂ ಎಟುಕದ ಕ್ಷಣ! ೨೮೩. ಸಹಸ್ರಾಕ್ಷೀ  ಸೃಷ್ಟಿ ಲಯಗಳ ನಡುವಿನ ಲೋಕಪಾಲನೆ ಸಮಸ್ಥಿತಿ ಬ್ರಹ್ಮಾಂಡ ಪರಿಪಾಲನೆ ನಿಭಾವಣೆಗೆಲ್ಲ ಸಮ ಸ್ಪೂರ್ತಿ ದೇವ ದೇವಿನಿ ಯೋಗಿನಿ ಮಂತ್ರಿಣೀ ಲಲಿತೆಯ ಅಕ್ಷೀ ಕೂಟವೈಭೋಗದೆ ಜಗನಡೆಸುವಳು ದೇವಿ ಸಹಸ್ರಾಕ್ಷೀ! ೨೮೪. ಸಹಸ್ರಪಾತ್  ಪಂಚದಶೀ ಮಂತ್ರ ಕೂಟ, ನಾಮಗಳಲೇ ಅಂತರ್ಗತ ಅರಿತಂತೆ ನಾಮಾವಳಿ ಸೂಕ್ತ, ಬೀಜಾಕ್ಷರ ಬಹಿರ್ಗತ ಸಹಸ್ರನಾಮ ಮಂತ್ರಕೂಟಧಾಮ, ಅರಿಯೆ ಕಿಂಚಿತ್ ಹೆಜ್ಜೆ ಗುರುತೆಲ್ಲೆಡೆ ಸುಳಿವಿಟ್ಟು, ಲಲಿತೆ ಸಹಸ್ರಪಾತ್! ೨೮೫. ಆಬ್ರಹ್ಮ-ಕೀಟ-ಜನನೀ  ಅಗಣಿತ ಶಿರ ಕರ್ಣ ಕರ ಚರಣ ನೇತ್ರಾದಿ ಸೃಷ್ಟಿಕಾರ್ಯದೆ ನಿರತ ಮನುಜನಿಂದಿಡಿದೆ ಕ್ರಿಮಿ ಕೀಟ, ಸಕಲಜೀವಿಯ ದೇವಿ ಸೃಷ್ಟಿಸುತ ಹಂಚುತ ಸತತ ಸೃಷ್ಟಿಗೆ, ಮರು ಸೃಷ್ಟಿಯ ಪರಬ್ರಹ್ಮದ ಸಿದ್ದಾಂತ ಪೀಳಿಗೆಯಿಂ ಪೀಳಿಗೆಗೆ ದಾಟಿಸಿ, ಆಬ್ರಹ್ಮ ಕೀಟ ಜನನೀ ವೃತ್ತಾಂತ! ೨೮೬. ವರ್ಣಾಶ್ರಮ-ವಿಧಾಯಿನೀ  ಸೃಷ್ಟಿ ಸಮರ್ಪಕ ಪರಿಪಾಲನೆ, ಅನುಸರಣೆಗೆ ವೇದ ಮಾರ್ಗ ಲಲಿತಾ ಸೃಷ್ಟಿ ಸನ್ಮಾರ್ಗ, ವಿಚಲಿಸಿರೆ ಜನ್ಮಾಂತರ ದೌಭಾಗ್ಯ ಪ್ರವೃತ್ತಿ ಶಕ್ತಿ ಜ್ಞಾನಾನುಭವದೆ ವರ್ಗೀಕರಿಸಿ ವರ್ಣ ಹೂ ಧಾನಿ ಗುಣಾನುಸಾರ ಕರ್ತವ್ಯ ನಿರ್ದೇಶಿಸಿ ವರ್ಣಾಶ್ರಮ ವಿಧಾಯಿನೀ! ಧನ್ಯವಾದಗಳೊಂದಿಗೆ, ನಾಗೇಶ ಮೈಸೂರು

ಶ್ರೀಧರ್ ಜಿ, " ಪಂಚದಶೀ ಮಂತ್ರದ ಮೊದಲನೆಯ ಕೂಟವು ರಹಸ್ಯವಾಗಿ ೨೭೮ ರಿಂದ ೨೮೪ನೇ ನಾಮಗಳಲ್ಲಿ ಬಹಿರಂಗವಾಯಿತು. ಎರಡನೇ ಹಾಗು ಮೂರನೇ ಕೂಟಗಳು (ह स क ह ल ह्रीं। स क ल ह्रीं॥ - ಹ ಸ ಕ ಹ ಲ ಹ್ರೀಂ| ಸ ಕ ಲ ಹ್ರೀಂ|| ) ಇವುಗಳು ೨೮೧ರಿಂದ ೨೮೪ನೇ ನಾಮಗಳಲ್ಲಿ ಬಹಿರಂಗವಾಗಿವೆ." ‍ಇದು ಅರ್ಥವಾಗಲಿಲ್ಲ.

ಗಣೇಶ್ ಜಿ, ನೀವು ಕೇಳಿದ ಪ್ರಶ್ನೆಯನ್ನು ಉತ್ತರಿಸಲು ಪ್ರಯತ್ನಿಸುತ್ತೇನೆ. ನಾನು ಎಷ್ಟರ ಮಟ್ಟಿಗೆ ಅದಕ್ಕೆ ಸೂಕ್ತ ವ್ಯಕ್ತಿಯೋ ತಿಳಿಯದು; ಏಕೆಂದರೆ ಚೇಳಿನ ಮಂತ್ರವೇ ಸರಿಯಾಗಿ ಗೊತ್ತಿಲ್ಲದವನು ಹಾವಿನ ಹುತ್ತಕ್ಕೆ ಕೈಹಾಕಬಾರದಲ್ಲವೇ? ನಿಮ್ಮ ಪ್ರಶ್ನೆ ಈ ವಿಧವಾಗಿದೆ. " ಪಂಚದಶೀ ಮಂತ್ರದ ಮೊದಲನೆಯ ಕೂಟವು ರಹಸ್ಯವಾಗಿ ೨೭೮ ರಿಂದ ೨೮೬ನೇ ನಾಮಗಳಲ್ಲಿ ಬಹಿರಂಗವಾಯಿತು. ಎರಡನೇ ಹಾಗು ಮೂರನೇ ಕೂಟಗಳು (ह स क ह ल ह्रीं। स क ल ह्रीं॥ - ಹ ಸ ಕ ಹ ಲ ಹ್ರೀಂ| ಸ ಕ ಲ ಹ್ರೀಂ|| ) ಇವುಗಳು ೨೮೧ರಿಂದ ೨೮೪ನೇ ನಾಮಗಳಲ್ಲಿ ಬಹಿರಂಗವಾಗಿವೆ." ‍ಇದು ಅರ್ಥವಾಗಲಿಲ್ಲ. ನಾನು ಪ್ರಯೋಗಿಸಿರುವ ಮೇಲಿನ ವಾಕ್ಯದಲ್ಲಿ ಎರಡು ದೋಷಗಳಿವೆ. ಮೊದಲನೆಯದು ಆಲೋಚಿಸದೇ ಮತ್ತು ಕಣ್ತಪ್ಪಿನ ದೋಷದಿಂದ ತಪ್ಪಾಗಿ ಅಚ್ಚು ಮಾಡಿರುವುದು ಮತ್ತು ಎರಡನೆಯದು ವ್ಯಾಕರಣಕ್ಕೆ ಸಂಭಂದಿಸಿದ್ದು. ವಾಸ್ತವವಾಗಿ ೨೭೮ರಿಂದ ೨೮೦ರಲ್ಲಿ ಪಂಚದಶೀ ಮಂತ್ರದ ಮೊದಲನೇ ಕೂಟವಾದ ವಾಗ್ಭವ ಕೂಟದ ಅಕ್ಷರಗಳಾ ಕ-ಎ-ಈ-ಲ-ಹ್ರೀಂ (क-ए-ई-ल-ह्रीं) ಬಹಿರಂಗವಾಗಿವೆ. ಆಗ, ಸರಿಯಾದ ವ್ಯಾಕರಣಬದ್ಧ ಮತ್ತು ಅಚ್ಚು ತಪ್ಪಿಲ್ಲದ ಪ್ರಯೋಗವು ಈ ವಿಧವಾಗಿ ಇರುತ್ತದೆ, "ಪಂಚದಶೀ ಮಂತ್ರದ ಮೊದಲನೆಯ ಕೂಟವು (ಕ-ಎ-ಈ-ಲ-ಹ್ರೀಂ क-ए-ई-ल-ह्रीं) ೨೭೮ರಿಂದ ೨೮೦ನೇ ನಾಮಗಳಲ್ಲಿ ರಹಸ್ಯವಾಗಿ ಬಹಿರಂಗಗೊಂಡರೆ(ಸೂಕ್ಷ್ಮವಾಗಿ ಅನಾವರಣಗೊಳಿಸಲ್ಪಟ್ಟರೆ), ಎರಡನೇ ಹಾಗು ಮೂರನೇ ಕೂಟಗಳು (ह स क ह ल ह्रीं। स क ल ह्रीं॥ - ಹ ಸ ಕ ಹ ಲ ಹ್ರೀಂ| ಸ ಕ ಲ ಹ್ರೀಂ|| ) ೨೮೧ರಿಂದ ೨೮೪ನೇ ನಾಮಗಳಲ್ಲಿ ಬಹಿರಂಗವಾಗಿವೆ. ಇನ್ನು ಅವು ಹೇಗೆ ಬಹಿರಂಗವಾಗಿವೆ ಎನ್ನುವ ಪ್ರಶ್ನೆಗೆ ಬರೋಣ, ಅದಕ್ಕೂ ಮೊದಲು ಕೆಳಗಿನ ವಿಷಯಗಳನ್ನು ಗಮನಿಸಿ. ೧. ಶ್ರೀ ಮಾತಾ, ೨. ಶ್ರೀ ಮಹಾರಾಜ್ಞೀ http://sampada.net/b... ಮೇಲಿನ ನಾಮಗಳ ವಿವರಣೆಯಲ್ಲಿನ ಕೆಳಗಿನ ವಾಕ್ಯವನ್ನು ಗಮನಿಸಿ. ಷೋಡಶೀ ಮಂತ್ರದ ಹದಿನಾರನೇ ಬೀಜಾಕ್ಷರವಾದ ಶ್ರೀಂ(श्रीं) ಅನ್ನು ಶ್+ರ್+ಈ+ಮ್=ಶ್ರೀ ಎನ್ನುವುದು ಲಕ್ಷ್ಮಿಯ ಬೀಜಾಕ್ಷರವಾಗಿದ್ದು ಇದು ಪರಿಪಾಲನೆಯ ಬೀಜವಾಗಿದೆ; ಅದನ್ನು ಈ ನಾಮದ ಮೊದಲ ಅಕ್ಷರವು ಒಳಗೊಂಡಿದೆ. ಅದೇ ವಿಧವಾಗಿ, ೮. ರಾಗಸ್ವರೂಪ-ಪಾಶಾಢ್ಯಾ, ೯. ಕ್ರೋಧಾಕಾರಙ್ಕುಶೋಜ್ವಲಾ, ೧೦. ಮನೋರೂಪೇಕ್ಷು-ಕೋದಂಡಾ, ೧೧. ಪಂಚತನ್ಮಾತ್ರ-ಸಾಯಕಾ http://sampada.net/b... ೮,೯,೧೦ ಮತ್ತು ೧೧ನೇ ನಾಮಗಳಲ್ಲಿ ರಹಸ್ಯವಾದ ಬೀಜಾಕ್ಷರಗಳು ಹುದುಗಿವೆ. ಉದಾಹರಣೆಗೆ, ಎಂಟನೇ ನಾಮದಲ್ಲಿ ಹ್ರೀಂ (ह्रीं) ಬೀಜಾಕ್ಷರವು ಅಡಗಿದೆ ಇದನ್ನು ಮಾಯಾಬೀಜವೆನ್ನುತ್ತಾರೆ. ಎಂಟನೆಯ ನಾಮವು ರಾಗಸ್ವ ಎಂದು ಪ್ರಾರಂಭವಾಗುತ್ತದೆ, ರ+ಅಗ+ಸ್ವ. ‘ಅಗ’ ಎಂದರೆ ಶಿವ ಮತ್ತು ಅವನ ಬೀಜವು ಹಾಂ (हां). ಇದನ್ನು ಹ ಎಂದು ತೆಗೆದುಕೊಳ್ಳಬೇಕು. ಮುಂದಿನದು ರ(र) ಮತ್ತು ಇದನ್ನು ಅದೇ ವಿಧದಲ್ಲಿ ತೆಗೆದುಕೊಳ್ಳಬೇಕು. ಸ್ವ ಎಂದರೆ ಈಂ(ईं), ಈ ಅಕ್ಷರದ ಮೇಲೆ ಬಿಂದು (ಚುಕ್ಕೆ) ಇದೆ ಎನ್ನುವುದನ್ನು ಗಮನಿಸಬೇಕು. ಆದ್ದರಿಂದ, ಹ+ರ+ಈಂ=ಹ್ರೀಂ ಮೂಲಕ ಹ್ರೀಂ ಬೀಜಾಕ್ಷರವು ಉಂಟಾಗುತ್ತದೆ. ಇದೇ ರೀತಿ ಉಳಿದ ಮೂರು ನಾಮಗಳಲ್ಲಿ ಬೀಜಾಕ್ಷರಗಳಾದ - ’ದ, ರ, ಕ, ಲ, ಯ, ಸ, ವ, ಆ, ಈ, ಊ’ಗಳು ರಹಸ್ಯವಾಗಿ ಹುದುಗಿವೆ. (ಆದ್ದರಿಂದ ಲಲಿತಾ ಸಹಸ್ರನಾಮವು ವೇದಗಳಿಗೆ ಸಮಾನವಾದುದೆಂದು ಪರಿಗಣಿತವಾಗಿದೆ. ಮುಖ್ಯವಾಗಿ ನೆನಪಿಡಬೇಕಾದದ್ದೇನೆಂದರೆ ಈ ಸಹಸ್ರನಾಮವನ್ನು ರಾಗ ಅಥವಾ ಸಂಗೀತದ ಸ್ವರಗಳ ಮೂಲಕ ಹಾಡಬಾರದು). ಆ ಬೀಜಾಕ್ಷರಗಳನ್ನು ಕೆಳಗಿನ ವಿಧಾನದಂತೆ ತಿಳಿದುಕೊಳ್ಳಬಹುದೆನ್ನುವುದನ್ನು ಗಮನಿಸಿ: ಕ್ರೋಧಾಕಾರಙ್ಕುಶೋಜ್ವಲಾ=ಕ್ರೋಧ+ಆಕಾರ+ಅಂಕುಶ+ಉಜ್ವಲಾ ....ಇದರಲ್ಲಿ ಕ, ರ, ಲ, ಆ, ವ, ಇವೆ. ಮನೋರೂಪೇಕ್ಷು-ಕೋದಂಡಾ=ಮನೋ+*ರೂಪ+ಈಕ್ಷು+ಕೋದಂಡಾ...ಇದರಲ್ಲಿ ಈ, ಊ, ದ ಇವೆ. (*ರೂ=ರ್+ಊ) ಪಂಚತನ್ಮಾತ್ರ-ಸಾಯಕಾ....ಇದರಲ್ಲಿನ ಸಾಯಕಾದಲ್ಲಿ ಸ ಮತ್ತು ಯ ಇವೆ. ಇನ್ನು ಪಂಚದಶೀ ಮಂತ್ರದ ವಿವರಣೆಗೆ ಬರೋಣ ಪಂಚದಶೀ ಮಂತ್ರ http://sampada.net/b... ವಾಗ್ಭವ ಕೂಟವು ಐದು ಬೀಜಾಕ್ಷರಗಳನ್ನು ಹೊಂದಿದೆ ಅವುಗಳೆಂದರೆ - ಕ‍ಎ-ಈ‍ಲ-ಹ್ರೀಂ ( क‍-ऎ-ई‍-ल-ह्रीं ) ಮಧ್ಯ ಕೂಟವು ಆರು ಬೀಜಾಕ್ಷರಗಳನ್ನು ಹೊಂದಿದೆ ಅವುಗಳೆಂದರೆ - ಹ-ಸ-ಕ-ಹ-ಲ-ಹ್ರೀಂ (ह्-स- क- ह्-ल- ह्रीं) ಶಕ್ತಿ ಕೂಟವು ನಾಲ್ಕು ಬೀಜಾಕ್ಷರಗಳನ್ನು ಹೊಂದಿದೆ ಅವುಗಳೆಂದರೆ - ಸ-ಕ-ಲ-ಹ್ರೀಂ ( स-क-ल-ह्रीं ) ಮೇಲೆ ತಿಳಿಸಿರುವುವು ಪಂಚದಶೀ ಮಂತ್ರದ ಹದಿನೈದು ಬೀಜಾಕ್ಷರಗಳು. ಈ ಮಂತ್ರವು ಈ ಬೀಜಗಳ ಮೂಲಕ ನೇರವಾಗಿ ವ್ಯಕ್ತವಾಗುವುದಿಲ್ಲ; ಆದರೆ ಸಂಸ್ಕೃತದ ಕೆಳಗಿನ ಶ್ಲೋಕದ ಮೂಲಕ ಪರೋಕ್ಷವಾಗಿ ವ್ಯಕ್ತವಾಗುತ್ತದೆ. ಕಾಮೋ ಯೋನಿ: ಕಮಲಾ ವಜ್ರಪಾಣಿರ್ಗುಹಾಹಸಾ ಮತರಿಶ್ವಾಭ್ರಾಮಿಂದ್ರಃ | ಪುನರ್ಗುಹಾಸಕಲ ಮಾಯಯಾ ಚ ಪುರುಚ್ಯೇಷಾ ವಿಶ್ವಮಾತಾದಿವಿದ್ಯಾ|| कामो योनि: कमला वज्रपाणिर्गुहाहसा मतरिश्वाभ्रामिन्द्रः। पुनर्गुहासकल मायया च पुरुच्येषा विश्वमातादिविद्या॥ ಈ ಶ್ಲೋಕದಲ್ಲಿ ಪಂಚದಶೀ ಮಂತ್ರದ ಹದಿನೈದು ಬೀಜಾಕ್ಷರಗಳು ಹುದುಗಿವೆ. ಇದು ಈ ಮಂತ್ರವು ಅತ್ಯಂತ ನಿಗೂಢವಾದುದು ಎನ್ನುವುದರ ಸ್ಪಷ್ಟ ಸಂಕೇತವಾಗಿದೆ. ಈ ಮಂತ್ರದಿಂದ ಪಂಚದಶೀ ಮಂತ್ರದ ಹದಿನೈದು ಬೀಜಾಕ್ಷರಗಳನ್ನು ಹೀಗೆ ಪಡೆಯಲಾಗಿದೆ. ಕಾಮಾನ್ (ಕ), ಯೋನಿಃ (ಎ), ಕಮಲಾ (ಈ), ವಜ್ರಪಾಣಿರ್ (ಲ), ಗುಹಾ (ಹ್ರೀಂ), ಹ (ಹ), ಸಾ (ಸ), ಮತರಿಶ್ವಾ (ಕ), ಅಬ್ರಮ್ (ಹ), ಇಂದ್ರಃ (ಲ) l ಪುನರ್ (ಪುನರ್ ಎಂದರೆ ಮತ್ತೆ) ಗುಹಾ (ಹ್ರೀಂ), ಸಕಲ (ಸ, ಕ, ಲ) ಮಾಯಯಾ (ಹ್ರೀಂ) ಚ ಪುರುಚ್ಯೇಷಾ ವಿಶ್ವಮಾತಾದಿವಿದ್ಯಾ ll ಮೊದಲನೇ ಕೂಟವು ಐದು ಬೀಜಾಕ್ಷರಗಳಾದ ಕ-ಎ-ಈ-ಲ-ಹ್ರೀಂ ಅನ್ನು ಒಳಗೊಂಡಿದೆ. ಎಲ್ಲಾ ಮೂರು ಕೂಟಗಳು ಹ್ರೀಂ ಬೀಜದಿಂದ ಕೊನೆಗೊಳ್ಳುತ್ತವೆ ಮತ್ತು ಹ್ರೀಂ ಅನ್ನು ಹೃಲ್ಲೇಖಾ ಎಂದು ಕರೆಯುತ್ತಾರೆ. ಈ ಹೃಲ್ಲೇಖಕ್ಕೆ ಬಹಳ ಮಹತ್ವವನ್ನು ಕೊಡಲಾಗಿದೆ ಮತ್ತು ಇದನ್ನು ಮಾಯಾ ಬೀಜವೆಂದೂ ಕರೆಯುತ್ತಾರೆ. ವಾಗ್ಭವ ಕೂಟವನ್ನು ಅಗ್ನಿ ಖಂಡ ಎಂದೂ ಕರೆಯಲಾಗುತ್ತದೆ ಏಕೆಂದರೆ ಇದು ಲಲಿತಾಂಬಿಕೆಯ ಜ್ಞಾನ ಶಕ್ತಿಯನ್ನು ಸೂಚಿಸುತ್ತದೆ. ಕ ಎಂದರೆ, ಸೃಷ್ಟಿಕರ್ತನಾದ ಬ್ರಹ್ಮ, ಎ ಎಂದರೆ ಜ್ಞಾನದ ಅಧಿದೇವತೆಯಾದ ಸರಸ್ವತೀ. ಈ ಎಂದರೆ ಲಕ್ಷ್ಮೀ, ಲ ಎಂದರೆ ಇಂದ್ರ ಮತ್ತು ಹ್ರೀಂ ಎಂದರೆ ಶಿವ ಮತ್ತು ಶಕ್ತಿಯರ ಐಕ್ಯವಾಗುವಿಕೆ. ಕ ಬೀಜವು ಕಾಮ ಕಲಾ ಬೀಜವಾದ ಕ್ಲೀಂ (क्लीं) ಎನ್ನುವುದರ ಮೂಲವಾಗಿದೆ. ಎರಡನೆಯದಾದ ಕಾಮರಾಜ ಕೂಟದಲ್ಲಿ, ಹ ಎನ್ನುವುದು ಎರಡು ಬಾರಿ ಪುನರಾವೃತವಾಗಿದೆ. ಮೊದಲನೇ ಹ ಅಕ್ಷರವು ಶಿವನಾದರೆ ಎರಡನೆಯದು ಆಕಾಶ ತತ್ವವನ್ನು ಸೂಚಿಸುತ್ತದೆ (ಸೌಂದರ್ಯ ಲಹರಿಯ ೩೨ನೇ ಸ್ತೋತ್ರವು ಈ ಎರಡನೇ ಹ ಬೀಜಾಕ್ಷರವನ್ನು ಸೂರ್ಯನೆಂದು ಉಲ್ಲೇಖಿಸುತ್ತದೆ) ಮತ್ತು ಈ ಕೂಟದಲ್ಲಿರುವ ಸ ಅಕ್ಷರವು ವಿಷ್ಣುವನ್ನು ಸೂಚಿಸುತ್ತದೆ. ಆದರೆ ಪಂಚಭೂತಗಳ ಸಂಕೇತಾಕ್ಷರಗಳಲ್ಲಿ ಸ ಎನ್ನುವುದು ವಾಯು ತತ್ವವನ್ನು ಸೂಚಿಸುತ್ತದೆ. ಹ ಬೀಜವನ್ನು ನಪುಂಸಕ ಬೀಜವೆಂದೂ ಕರೆಯಲಾಗಿದೆ; ಬಹುಶಃ ಈ ಕಾರಣದಿಂದಾಗಿಯೇ ಹ್ರೀಂ ಬೀಜವು ಶಿವ-ಶಕ್ತಿಯರ ಐಕ್ಯತೆಯನ್ನು ಸೂಚಿಸುತ್ತದೆ. ಮೊದಲನೇ ಕೂಟದಲ್ಲಿ ಬ್ರಹ್ಮನನ್ನು ಹೆಸರಿಸಲಾಗಿದೆ, ಏಕೆಂದರೆ ಮೊದಲನೇ ಕೂಟವು ಸೃಷ್ಟಿಯನ್ನು ಸೂಚಿಸುತ್ತದೆ. ಸ್ಥಿತಿಪಾಲನೆಯ ಈ ಕೂಟದಲ್ಲಿ ವಿಷ್ಣುವನ್ನು ಹೆಸರಿಸಲಾಗಿದೆ, ಏಕೆಂದರೆ ಅವನು ಸ್ಥಿತಿಕರ್ತನಾಗಿದ್ದಾನೆ. ಈ ಹಿನ್ನಲೆಯಲ್ಲಿ ನಿಮ್ಮ ಪ್ರಶ್ನೆಗೆ ಸಂಭಂದಿಸಿದಂತೆ; ೨೭೮ರಿಂದ ೨೮೦ನೇ ನಾಮಗಳು ಮತ್ತು ೨೮೧ರಿಂದ ೨೮೪ನೇ ನಾಮಗಳನ್ನು ತಿಳಿದುಕೊಳ್ಳಲು ಪ್ರಯತ್ನಿಸೋಣ. ೨೭೮. ಪದ್ಮಾಸನಾ; ೨೭೯. ಭಗವತೀ; ೨೮೦. ಪದ್ಮನಾಭ ಸಹೋದರೀ; ವಾಗ್ಭವ ಕೂಟವು ಐದು ಬೀಜಾಕ್ಷರಗಳನ್ನು ಹೊಂದಿದೆ ಅವುಗಳೆಂದರೆ - ಕ‍ಎ-ಈ‍ಲ-ಹ್ರೀಂ ( क‍-ए-ई‍-ल-ह्रीं ) ಪದ್ಮಾಸನಾ ಎಂದರೆ ಅದು ಪದ್ಮಾಸನ ಎಂದು ಕರೆಯಲ್ಪಡುವ ಸೃಷ್ಟಿಕರ್ತ ಬ್ರಹ್ಮನ ಹೆಂಡತಿಯೂ ಆಗಬಹುದು. ಮತ್ತು ಬ್ರಹ್ಮ ಮತ್ತು ಸರಸ್ವತಿಯರ ಬೀಜಾಕ್ಷರಗಳು ಕ್ರಮವಾಗಿ ’ಕ’ ಮತ್ತು ’ಎ’ ಆಗಿವೆ. ಪದ್ಮಾ (ಕಮಲಾ) ಅಂದರೆ ಪರೋಕ್ಷವಾಗಿ ಲಕ್ಷ್ಮಿಯನ್ನು ಸೂಚಿಸುತ್ತದೆ ಮತ್ತವಳ ಬೀಜಾಕ್ಷರವು ಈ ಆಗಿದೆ. ಅಥವಾ ಭಗವ’ತೀ’ ಮಂತ್ರದಲ್ಲಿನ ’ಈ’ ಲಕ್ಷ್ಮೀ ಬೀಜವಾಗಿದೆ. ಭಗವತೀ ಎಂದರೆ ಅದು ವಿಶ್ವಯೋನಿಯನ್ನೂ ಸೂಚಿಸುತ್ತದೆ ಮತ್ತು ಪಂಚದಶೀ ಮಂತ್ರದ ಪ್ರಕಾರ ಯೋನಿಯ ಬೀಜಾಕ್ಷರವು (ಎ) ಆಗಿದೆ. ಭಗ ಎಂದರೆ ಶ್ರೇಷ್ಠತೆ (ಸಾರ್ವಭೌಮತೆ), ಧರ್ಮನಿಷ್ಠೆ, ಪ್ರಸಿದ್ಧಿ (ಕೀರ್ತಿ), ಅಭ್ಯುದಯ (ಸಮೃದ್ಧಿ), ಬುದ್ಧಿವಂತಿಕೆ ಮತ್ತು ವಿವೇಕ (ವಿವೇಚನೆ); ಬಹುಶಃ ಇವು ಸರ್ವತ್ರ ವಿಜಯಿಯಾಗುವ ಇಂದ್ರನ ಗುಣಗಳನ್ನು ತಿಳಿಸಬಹುದು ಹಾಗಾಗಿ ಪರೋಕ್ಷವಾಗಿ ಇದು ಅವನ ಬೀಜಾಕ್ಷರವಾದ ’ಲ’ವನ್ನು ಸೂಚಿಸಬಹುದು. ಪದ್ಮನಾಭ ಸಹೋದರೀ ಎನ್ನುವಲ್ಲಿ ದೇವಿಯು ಭಗವಾನ್ ವಿಷ್ಣುವಿನ ತಂಗಿಯಾಗಿದ್ದಾಳೆ. ಬ್ರಹ್ಮ ಮತ್ತು ಲಕ್ಷ್ಮೀ, ವಿಷ್ಣು ಮತ್ತು ಉಮಾ, ಶಿವ ಮತ್ತು ಸರಸ್ವತೀ ಇವರುಗಳು ಅವಳಿಗಳಾಗಿದ್ದಾರೆ. ಅವರು ಕ್ರಮವಾಗಿ ಸೃಷ್ಟಿ, ಸ್ಥಿತಿ ಮತ್ತು ಲಯಗಳನ್ನು ಪ್ರತಿನಿಧಿಸುತ್ತಾರೆ. ಸರಸ್ವತಿಯು ಬ್ರಹ್ಮನನ್ನು ಮದುವೆಯಾದರೆ, ಲಕ್ಷ್ಮಿಯು ವಿಷ್ಣುವನ್ನು ಮತ್ತು ಉಮೆಯು ಶಿವನನ್ನು ಮದುವೆಯಾದಳು. ಸೃಷ್ಟಿ ಕ್ರಿಯೆಯಲ್ಲಿ ಒಬ್ಬರ ಮೇಲೆ ಮತ್ತೊಬ್ಬರು ಪರಸ್ಪರ ಅವಲಂಭಿಸಿರುವುದನ್ನು ಬಹಳ ಸುಂದರವಾಗಿ ಪುರಾಣವು ಈ ರೀತಿಯಾಗಿ ವಿವರಿಸುತ್ತದೆ. ಹಾಗಾಗಿ ಈ ನಾಮವು ಪರೋಕ್ಷವಾಗಿ ಸೃಷ್ಟಿ, ಸ್ಥಿತಿ ಮತ್ತು ಲಯಬೀಜವಾದ ಹ್ರೀಂ ಅನ್ನು ಸೂಚಿಸುತ್ತದೆ. ೨೮೧.ಉನ್ಮೇಷ-ನಿಮಿಷೋತ್ಪನ್ನ-ವಿಪನ್ನ-ಭುವಾನವಲೀ; ೨೮೨.ಸಹಸ್ರ-ಶೀರ್ಷ-ವದನಾ; ೨೮೩.ಸಹಸ್ರಾಕ್ಷೀ; ೨೮೪.ಸಹಸ್ರಪಾತ್; ಮಧ್ಯ ಕೂಟವು ಆರು ಬೀಜಾಕ್ಷರಗಳನ್ನು ಹೊಂದಿದೆ ಅವುಗಳೆಂದರೆ - ಹ-ಸ-ಕ-ಹ-ಲ-ಹ್ರೀಂ (ह्-स- क- ह्-ल- ह्रीं) ಶಕ್ತಿ ಕೂಟವು ನಾಲ್ಕು ಬೀಜಾಕ್ಷರಗಳನ್ನು ಹೊಂದಿದೆ ಅವುಗಳೆಂದರೆ - ಸ-ಕ-ಲ-ಹ್ರೀಂ ( स-क-ल-ह्रीं ) ೨೮೧.ಉನ್ಮೇಷ-ನಿಮಿಷೋತ್ಪನ್ನ-ವಿಪನ್ನ-ಭುವಾನವಲೀ ಎನ್ನುವುದು ಸೃಷ್ಟಿ ಮತ್ತು ಲಯಗಳನ್ನು ಸೂಚಿಸುವುದರಿಂದ ಅದು ಸಹಜವಾಗಿಯೇ ಹ್ರೀಂ ಬೀಜಾಕ್ಷರಗಳನ್ನು ಪ್ರತಿನಿಧಿಸುತ್ತದೆ. ೨೮೨ ರಿಂದ ೨೮೪ರವರೆಗೆ ಸಹಸ್ರ ಎನ್ನುವಲ್ಲಿ ಸ,ಹ,ಗಳು ಬರುತ್ತವೆ. ಮತ್ತು ಇವೆಲ್ಲವೂ ಪರಬ್ರಹ್ಮದ ಕ್ರಿಯೆಯಾದ ಪಾಲನೆಯನ್ನು ಕುರಿತು ಹೇಳುವುದರಿಂದ ಅವುಗಳನ್ನು ಪರಿಪಾಲನೆಯ ಬೀಜವಾದ ಹ್ರೀಂನೊಂದಿಗೆ ಸಮೀಕರಿಸಬಹುದು. ಮೊದಲನೇ ನಾಮದಲ್ಲಿ ಸೃಷ್ಟಿಯನ್ನುಂಟು ಮಾಡಲು ಸೃಷ್ಟಿಕರ್ತನಾದ ಬ್ರಹ್ಮನ ಪ್ರಸ್ತಾಪವು ಪರೋಕ್ಷವಾಗಿ ಬರುವುದರಿಂದ ಅವನ ಬೀಜವಾದ ’ಕ’ವು ಇದರಲ್ಲಿ ಹುದುಗಿದೆ ಎಂದು ತಿಳಿಯಬಹುದೇನೋ? ಅದೇ ವಿಧವಾಗಿ ಸೃಷ್ಟಿ ಪ್ರಕ್ರಿಯೆಯು ಪಂಚಭೂತಗಳಿಂದ ಉಂಟಾಗುವುದರಿಂದ ಅವುಗಳ ಅಧಿದೇವತೆಯಾದ ಇಂದ್ರನ ಬೀಜವಾದ ’ಲ’ವನ್ನು ಇದರಲ್ಲಿ ಹುದುಗಿದೆ ಎಂದುಕೊಳ್ಳಬಹುದೇನೋ? ಮೇಲಿನ ವಿಶ್ಲೇಷಣೆಗಳನ್ನು ನನಗೆ ತಿಳಿದಂತೆ ಮಾಡಿದ್ದೇನೆ; ಇದು ಸಮಂಜಸವಾದುದೆಂದು ಖಂಡಿತವಾಗಿಯೂ ಹೇಳಲಾರೆ; ಇದನ್ನು ಶ್ರೀಯುತ ವಿ. ರವಿಯವರನ್ನು ಕೇಳಿ ಸ್ಪಷ್ಟ ಪಡಿಸಿಕೊಳ್ಳಬೇಕು. ಅವರ ಮುಂದೆಯೂ ಈ ಪ್ರಶ್ನೆಯನ್ನಿಟ್ಟು ಅದಕ್ಕೆ ಸಮರ್ಪಕವಾದ ಉತ್ತರ ಬಂದ ಕೂಡಲೇ ಅದನ್ನು ಸಂಪದಿಗರೊಂದಿಗೆ ಹಂಚಿಕೊಳ್ಳುತ್ತೇನೆ. ವಂದನೆಗಳೊಂದಿಗೆ, ಶ್ರೀಧರ್ ಬಂಡ್ರಿ