ಸಂಪದದಲ್ಲಿ ವಾದ ವಿಮರ್ಶೆ ಚರ್ಚೆಗಳಿಗೆ ಎಂದು ಬರವಿಲ್ಲ. ಚರ್ಚೆಗಳು ಕೆಲವೊಮ್ಮೆ ತೀರ ವೈಯುಕ್ತಿಕ ಮಟ್ಟದಲ್ಲಿಯು ನಡೆದು ಇಬ್ಬರ ನಡುವ ವಾಕ್ಯಗಳ ಘರ್ಷಣೆ ಆಗಿರುವುದು ಉಂಟು. ನ೦ತರ ಹಾಗೆ ತಣ್ಣಗು ಆಗಿರುತ್ತದೆ. ಅಷ್ಟು ಘರ್ಷಣೆ ನಡೆಯುವಾಗಲು ಅವರ ನಡುವೆ ಯಾವುದೋ ಒಂದು ವಿಷಯವಿರುತ್ತಿತ್ತು.  ಮತ್ತು ತೀರ ಕೆಳಮಟ್ಟದ ಮಾತುಗಳನ್ನು ಬಳಸಿ ಜಗಳ ಆಗಿರುವುದು ಕಡಿಮೆ. 

ಅಂತರ್ಜಾಲ ಎಂಬುವುದು ಅಧುನಿಕ ವಿಜ್ಞಾನ ಮನುಜನಿಗೆ ನೀಡಿರುವ ವರ. ತನ್ನಲ್ಲಿಯ ವಿಷಯಗಳನ್ನು ಇತರರಿಗೆ ಹಂಚುತ್ತ, ಇತರರಲ್ಲಿ ಇರಬಹುದಾದ ಜ್ಞಾನವನ್ನು ನಾವು ಪಡೆಯುತ್ತ ಒಬ್ಬರೊಬ್ಬರಿಗೆ ಕೊಡುವ ತೆಗೆದುಕೊಳ್ಳುವ ಕ್ರಿಯೆಯಿಂದ ಇಬ್ಬರು ಬೆಳೆಯುತ್ತ ಹೋಗಬಹುದಾದ ಸೌಲಭ್ಯ.  ಅದಕ್ಕೆ ಪೂರಕವಾಗಿ ಇರುವುದು ಪ್ರತಿಕ್ರಿಯೆಗಳು ಮತ್ತು ಅದಕ್ಕೆ ಮತ್ತೆ ಪ್ರತಿಕ್ರಿಯೆ. ಆದರೆ ಇಂತ ಸೌಲಭ್ಯಗಳನ್ನು ಬಳಸಿಕೊಳ್ಳುವದರ ಬದಲಿಗೆ , ತಮ್ಮ ಲೇಖನಗಳನ್ನು ಸದಾ ಬೇರೆಯವರ ನಂಬಿಕೆಗಳನ್ನು ಜರಿಯುತ್ತ, ನಿಂದಿಸುತ್ತ, ನೆಲದ ಸಂಸ್ಕೃತಿಯನ್ನು ಹೀಯಾಳಿಸುತ್ತ ಸತತವಾಗಿ ಬರೆಯುತ್ತಿದ್ದರೆ, ಉಳಿದ ಸದಸ್ಯರಿಗೆ ಸದಾ ಕಿರಿಕಿರಿಯಾಗುತ್ತದೆ, ಹಾಗಿದ್ದರು ಸಂಪದದ ಓದುಗರು ಸಹೃದಯಿಗಳು, ತಮಗೆ ನೋವಾದರು , ನಿರ್ಲಕ್ಷಿಸಿ ಸುಮ್ಮನಾಗುವವರೆ ಜಾಸ್ತಿ.  
 
ಆದರೆ ಈ ಮೌನವನ್ನು ಅರ್ಥಮಾಡಿಕೊಳ್ಳದೆ  ಬೇರೆಯವರ ಹುಟ್ಟನ್ನೆ ಪ್ರಶ್ನಿಸುವ ಮಟ್ಟದ ವಾಕ್ಯಗಳನ್ನು ಬರೆಯುತ್ತ ಇದ್ದರು ಸಹ ಸುಮ್ಮನಿರಲು ಏಕೊ ನನಗೆ ಇಷ್ಟವಾಗುತ್ತಿಲ್ಲ. ದೇವರನ್ನು ನಾನು ನಂಬುವೆನೊ ಇಲ್ಲವೊ ನನಗೆ ಗೊತ್ತಿಲ್ಲ. ನಮ್ಮ ಸ೦ಸ್ಕೃತಿಯ ಆಳವೆಷ್ಟು ನನಗೂ ಗೊತ್ತಿಲ್ಲ. ದೇವರು ಇದ್ದಾನೆಯೊ ಇಲ್ಲವೊ ನನಗೆ ತಿಳಿಯದು. ಎಲ್ಲವನ್ನು ಒಪ್ಪುತ್ತೇನೆ.  ಆದರೆ ಯಾರೆ ಆಗಲಿ ದೇವರನ್ನು ಅದರಲ್ಲೂ ಕೃಷ್ಣನನ್ನು ನಂಬಿದರೆ ಅಂತವರ ಹುಟ್ಟೆ ಪ್ರಶ್ನಾರ್ಹ ಎನ್ನುವ ರೀತಿಯ ಲೇಖನಗಳನ್ನು ಬರೆಯುವುದು ಸರಿಯೆ?
 
ನಮ್ಮ ಸಮಾಜದಲ್ಲಿ ಎಲ್ಲವು ಸರಿಯಿಲ್ಲ, ಯಾವುದು ಸರಿಯಿಲ್ಲ, ಅದಕ್ಕೆ ಕಾರಣರಾದವರು ಎಷ್ಟೊ ಜನ ಇದ್ದಾರೆ, ನೋವು ಸಹಿಸಿ ಕಣ್ಣೀರ ಸುರಿಸುವವರು , ಇದ್ದಾರೆ, ಶೋಷಣೆಗೆ ಹಲವು ಮುಖಗಳಿವೆ, ಶೋಷಣೆ ಸಹಿಸಿ ಸಿಡಿಯುವವರು ಇದ್ದಾರೆ, ಅದಕ್ಕೆ ಯಾರೊ ಒಬ್ಬ ವ್ಯಕ್ತಿಗಳು ಕಾರಣರಾಗಿರುವದಿಲ್ಲ.  ಈ ಶೋಷಣೆ ಶೋಷಿತ ಎನ್ನುವ ಪದಗಳ ವ್ಯಾಪ್ತಿಗಳೆಲ್ಲ ಪದಗಳಿಗೆ ಸಿಕ್ಕುವದಲ್ಲಿ ಅದನ್ನು ಅನುಭವಿಸಿದವರಿಗಷ್ಟೆ ತಿಳಿಯುವುದು ,  ಎಲ್ಲವು ನಿಜ. ಆದರೆ ಅದನ್ನು ತಿದ್ದಬೇಕಾದವರು ಯಾರು. ಒಬ್ಬ ವ್ಯಕ್ತಿಯಿಂದ ಆಗುವ ಕೆಲಸಗಳಲ್ಲ, ಸಮಾಜವನ್ನು ತಿದ್ದಿ ಹೊಸದಿಕ್ಕಿಗೆ ಕರೆದೊಯ್ಯಬೇಕಾದ ಕೆಲಸ ಈಗಿನ ಯುವಕರಿಂದ ಆಗಬೇಕಾಗಿದೆ.
 
ಅವರಿಗೆ ಸಿಕ್ಕಿರುವ ಆಯುಧ ಈ ಅಂತರ್ಜಾಲ ಎಂಬ ಮಾದ್ಯಮ, ಇದರ ಮೂಲಕ ಸಮಾಜವನ್ನು ತಿದ್ದುವ , ಹೊಸದಾಗಿ ಕಟ್ಟುವ ಕೆಲಸ ಆಗಬೇಕಾಗಿದೆ .
 
ಆದರೆ ಆಗುತ್ತಿರುವದಾದರು ಏನು, ಸದಾ ಮತ್ತೊಬ್ಬರನ್ನು ನಿಂದಿಸುತ್ತ, ದ್ವೇಷದ ಉಸಿರನ್ನು ಬಿಡುತ್ತಲಿದ್ದರೆ, ತಿದ್ದುವ ಕ್ರಿಯೆ ಸಾದ್ಯವೆ ? 
 
ನಾನು ಎರಡು ವರ್ಷದ ಕೆಳಗೆ ಯಾವುದೊ ಕನಸು ಹೊತ್ತು ಬಂದೆ, ಈ ಅಂತರ್ಜಾಲ ಎಂಬ ಮಾಯಾ ಮೃಗ ನನ್ನನ್ನು ಯಾವುದೊ ಕನಸಿನ ಲೋಕಕ್ಕೆ ಕರೆದೊಯ್ಯುತ್ತೆ ಎಂದು. ಆದರೆ ಇದು ನಮ್ಮ ಸಮಾಜದ ಕನ್ನಡಿಯಷ್ಟೆ ,, ಇಲ್ಲಿರುವ  ವಿಕೃತ, ಸುಕೃತ, ಶಾಂತ, ಮೌನ, ದ್ವೇಷ, ಪ್ರೇಮ, ಪ್ರೀತಿಯ ಹಲವು ನಗ್ನ ಮುಖಗಳು ಏಕೊ ಅನಿಸುತ್ತಿದೆ,  ಈ ಅಂತರ್ಜಾಲದ ಸಂಬಂಧ ಮುಂದುವರಿಸಬೇಕೆ ಎಂದು.
 
ಇಲ್ಲಿ ನಾನು ಏನು ಸಾಧಿಸುತ್ತಿದ್ದೇನೆ ನನಗೆ ತಿಳಿಯುತ್ತಿಲ್ಲ