ಕೊನೆಗೂ ಚುನಾವಣೆಯ ಫಲಿತಾಂಶ ಹೊರಬಿದ್ದು, ನಿಚ್ಛಳ ಬಹುಮತದೊಂದಿಗೆ ಮೋದಿ ಸರಕಾರ ಗದ್ದುಗೆಗೇರಲಿದೆ. ಈ ಬಾರಿಯ ಸಂತಸದ ಸುದ್ದಿಯೆಂದರೆ ಒಂದು ಪಕ್ಷಕ್ಕೆ ಸಂಪೂರ್ಣ ಬಹುಮತೆ ಸಿಕ್ಕಿರುವುದು. ಹೀಗಾಗಿ ಸಮಯಸಾಧಕ ರಾಜಕೀಯ ಗುಂಪುಗಳ ಕಾಟ, ಗೋಳಾಟ ಇರುವುದಿಲ್ಲ. ಸ್ಪೈಡರ್ ಮ್ಯಾನ್ ನಲ್ಲಿ ಹೇಳುವಂತೆ 'ಹೆಚ್ಚಿನ ಸಾಮರ್ಥ್ಯವಿದ್ದಷ್ಟೂ ಹೊಣೆಗಾರಿಕೆಯ ಹೊರೆಯೂ ಹೆಚ್ಚಿರುತ್ತದೆ' - ಎಂಬ ಮಾತನ್ನು ಮರೆಯದೆ ಆಡಳಿತ ನಡೆಸಿದರೆ ಸಾಕು, ದೇಶ ಪ್ರಗತಿಯತ್ತ ದಾಪುಗಾಲಿಕ್ಕುವುದರಲ್ಲಿ ಅನುಮಾನ ಇರುವುದಿಲ್ಲ . 

ಚುನಾವಣೆಯ ಪ್ರಕ್ರಿಯೆ ದೂರದ ಸಿಂಗಪುರದಿಂದಲೆ ಗಮನಿಸುತ್ತ ನಡುವೆ ಒಂದೆರಡು ಕವನ ಬರೆದಿದ್ದೆ. ಆದರೆ ಚುನಾವಣಾ ಪ್ರಕ್ರಿಯೆಯ ನಡುವೆ ಹಾಕುವುದು ಉಚಿತವಲ್ಲವೆಂದು ಪ್ರಕಟಿಸಿರಲಿಲ್ಲ. ಈಗ ಫಲಿತಾಂಶವೂ ಹೊರ ಹೊಮ್ಮಿರುವುದರ ಕಾರಣ ಸಂಪದದಲ್ಲಿ ಹಾಕುತ್ತಿದ್ದೇನೆ - ಈ ಅದ್ಭುತ ವಿಜಯಕ್ಕೆ ಮೋದಿ ಮತ್ತು ಬೀಜೆಪಿಗೆ ಅಭಿನಂದಿಸುತ್ತ ಮತ್ತು ಮೌಲಿಕ ರಾಜ್ಯಭಾರದ ಆಶಯದೊಂದಿಗೆ :-) 

೦೧. ಗೆದ್ದ ಗಳಿಗೆ  

____________________

ಕುಣಿದಾಡಿದ್ರಣ್ಣ ಎಗರಾಡಿದ್ರಣ್ಣ

ತಲೆಕೆಳಗಾಗಿ ನೇತಾಡಿದ್ರಣ್ಣ

ತುಂಬಾ ಶ್ಯಾಣೆ ಬಗ್ಗದ ಜಾಣ

ಕೈಲಿರದಿದ್ದರೂ ಸರಿ ರಾಮಬಾಣ ||

ಎಷ್ಟೊಂದುದ್ದದ ಚುನಾವಣೆ ಯಾನ

ಬೆವರಾಡಿ ಸುಸ್ತಾಗಿ ಮುಗಿದರೆ ಸಾಕಣ್ಣ

ಎಂದವರೆ ಎಲ್ಲ, ಪಕ್ಷಗಳು ಹೊರತಲ್ಲ

ನಿಟ್ಟುಸಿರು ಬಿಟ್ಟ ಜನ 'ಸದ್ಯ ಮುಗೀತಲ್ಲ' ||

ಕಿತ್ತಾಟ ಚೀರಾಟ ಬೈದಾಟ ಪ್ರತಾಪ

ಚಾರಿತ್ರ ವಧೆಯ ಜತೆ ಹಗರಣದ ಕೂಪ

ಕುರುಕ್ಷೇತ್ರದ ಸಮರ ನಡೆದಂತೆ ಪೂರ

ಮೀಡಿಯಾ ಜನ ಕೂಡ ಮಂಕಾದ ಸ್ವರ ||

ಮಾತಿನ ಮೋಡಿ ಮೋದಿಯ ಜಾಡಿ

ಚತುರ ಮಾತಲ್ಲೆ ಮುರಿದಂತೆ ಕಡ್ಡಿ

ಮುನಿಸೆ ಇಲ್ಲ ಸರಿ ತರ್ಕದ ಬಗಲ

ಅಂಕಿ ಅಂಶ ಪ್ರಗತಿ ಹೆಸರಲ್ಲೆ ಸಕಲ ||

ಬೈಯ್ದವರು ಮೋದಿ ಹೊಗಳಿದರೂ ಮೋದಿ

ನಾಮೋಚ್ಛಾರದಲಿ ಎತ್ತಿ ಹಿಡಿದಾ ಮಂದಿ

ಮಾತಾಡೆ ಕಷ್ಟ ಆಡದಿರಲು ಸಂಕಷ್ಟ

ಕುಡಿಯಲಾಗದ ಬಿಡದ ಬಿಸಿ ಚಹದ ಕಷ್ಟ ||

೦೨. ನಾಯಕತ್ವದ ಸತ್ವ

_________________________

ಮಗಳೆನ್ನದಿದ್ದರೂ ಮಗಳಾಗಿಸಿ ಸುದ್ದಿ

ಭೂ ಮಾರಾಟ ರಾದ್ದಾಂತವನು ಗುದ್ದಿ

ಕದ್ದಾಲಿಕೆ ಜಾಡಿಸಿ ಕಾಲೆಳೆದವರೆಲ್ಲಾ

ಭ್ರಷ್ಟಾಚಾರಕುತ್ತರ ಪ್ರಗತಿ ಮಾತೆ ಇಲ್ಲ! ||

ಆಡಿಕೊಳ್ಳುವ ಅವಸರದಲಿ ಗೋದ್ರಾ

ಭಾಷಣ ಮಾಡಲು ಬಿಡದಾ ಖದರ

ಸ್ಮೃತಿಯಿಂದ ದೂರ 'ಯಾರಾಕೆ?' ಎನ್ನುವರ

ಗೋಳಾಡಿಸಿದಷ್ಟು ಮೋದಿ ಕೀರ್ತಿ ಪ್ರಖರ ||

ಜೀವನ ಶೈಲಿ ಹಿಂದುತ್ವ, ಸಹಿಷ್ಣುತೆ ಬಲ

ಒಂದೇ ಭಾರತೀಯ ಪರಿಕಲ್ಪನೆ ಹೃದಯ

ಪ್ರಗತಿ ಮಂತ್ರ ದೇಶೋದ್ದಾರದ ಕನಸು

ಎದೆಗಾರಿಕೆಯುತ್ತರ ಭರವಸೆ ಹುಲುಸು ||

ನಾಯಕತ್ವದ ಅಪರೂಪದ ಮಾದರಿ

ತನ ರಾಜ್ಯದ ಯಶ ತಂಡಕೆ ಹಂಚಿದ ಪರಿ

'ತಿನ್ನುವುದಿಲ್ಲ ತಿನ್ನಬಿಡುವುದಿಲ್ಲ' ಸದ್ದು ಕೇಳಿಸಿತ ?

ಬಾಯ್ಮುಚ್ಚಿ ಕೂರೆ ಸರಿ ಪಕ್ಷದೊಳ ಧೂರ್ತ ||

ಕಂಡಿರಲಿಲ್ಲ ಇಂಥಹ ನಾಯಕತ್ವ ಸತ್ವ

ಮಲಿನವಾಗದೆ ದೇಶ ನಡೆಸಿದರೆ ತತ್ವ

ಬರೆಯಬಹುದು ಹೊಸ ಇತಿಹಾಸ

ಮರೆಸೆಲ್ಲ ತರದ ಕೀಳರಿಮೆ ಸಂಘರ್ಷ ||

ಧನ್ಯವಾದಗಳೊಂದಿಗೆ 

ನಾಗೇಶ ಮೈಸೂರು