ಚಂದಿರನೆಂಬ ಇಂದಿರ ಗೊತ್ತ?

ನಿದಿರೆಯ ತುಂಬೊ ನಿಯ್ಯತ್ತಿನ ಗ್ರಾಸ್ತ

ಬೆಳ್ಳನೆ ಹಾಲಿನ ಬೆಳದಿಂಗಳ ಹುತ್ತ

ತಂಪೆರೆಯುತ ತೂಗುವ ಸವಲತ್ತ ! ||

ಬಾನಿನ ತುಂಬ ಬಣ್ಣದ ಗಿಲಕಿ

ಬೆಳ್ಳಂಬೆಳ್ಳಗೆ ತೆರೆದಿಟ್ಟ ಕಿಟಕಿ

ಕಟಕಿಯಾಡದೆ ಕಾರುತ ಸುಧೆಯ

ಸುರಿದಾಡಿ ಹೃದಯ ಚಂದ್ರೋದಯ ||

ಯಾರೊ ಬಿರಡೆಯ ತಿರುಗಿಸಿದವರು?

ನಿರಂತರ ಸುಖ ಹರಿದಂತೆ ಬೆವರು

ತೇಲಾಡಿದ ಸ್ವೇಚ್ಛೆ, ಸ್ವೈರ ವಿಹಾರ

ಕಂಡಲ್ಲೆ ಮನ ಕುಣಿದಾಡುವ ಕಾತರ ||

ದಿನದಿನವು ಬಹನು ಅವಸರವಿಲ್ಲ

ಕೃಶಕಾಯದಿಂದ ದೃಢಕಾಯ ಬಾಲ

ಹಿಗ್ಗುತ ಕುಗ್ಗುತ ನಿರಂತರ ಚಕ್ರ

ಕೃಷ್ಣಪಕ್ಷದಿಂ ಪೌರ್ಣಿಮೆಯ ಸೂತ್ರ ||

ವೃದ್ಧಿ ಕ್ಷಯಗಳಲಿ ಜೀವನ ಸೂತ್ರ

ಹುಟ್ಟು ಸಾವುಗಳ ನಿರಂತರ ಪಾತ್ರ

ನಿಯಮದ ಬದುಕಿಗೆ ಚಂದ್ರಮ ಸದಾ

ಹೆಗ್ಗುರುತಾಗಿಹನೆ ಆಗಸದ ಸಂಪದ || 

ಧನ್ಯವಾದಗಳೊಂದಿಗೆ 

ನಾಗೇಶ ಮೈಸೂರು