ಪಾಪದ ಹುಡುಗ ಹುಡುಗಿಯರ

ಬದುಕರಳುವ ಗೊಂದಲ

ಕಳಚುತ್ತೆಷ್ಟೊಂದು ಪದರ

ಹುಡುಕಬೇಕು ಅಂಗುಲ, ಚದರ ||

ಹೇಳಿಕೊಡುವರಿಲ್ಲವೆನ್ನುವಂತಿಲ್ಲ

ಮಸಲ ಸಂಗತಾಸಂಗತ ಪ್ರಶ್ನೆ

ಹಿತಾಹಿತ ಸಂಶಯವೆ ಸಲಹುತ್ತ

ಹುತ್ತಗಟ್ಟಿದ ಭೂತ ಅನುಮಾನ ||

ಕಲಿಕೆಯೇನೊ ಸಹಜ ನಿಜ

ಕಲಿಯಲುಂಟು ಸಾಗರದಪಾರ

ಖನಿಜ, ಲವಣ, ಜೀವಜಲ ರಾಶಿ

ಕೈಯಿಡಲೆಲ್ಲಿ ಮೊದಲು, ಕೊನೆ? ||

ಆರಂಭಿಸಲೆಂತು ಎಲ್ಲೊ, ಹೇಗೊ?

ಅನುಭವದ ಸುಡು ಬೆಂಕಿ ತಂಪು

ಹುಮ್ಮಸ್ಸು ಉತ್ಸಾಹಗಳ ಗಂಟು

ದಾಟಿಸೆ ಸಾಕೆ ದರ್ಶಿಸುತ ಮಾರ್ಗ ? ||

ಬೀಜ ಮೊಳೆತು ಸಸಿಯಾಗರಿತು

ಗಿಡ ಮರ ಹೆಮ್ಮರವಾಗುವ ಚಿತ್ತ

ಅನಾವರಣಕನುವಾಗೆ, ಹಳೆ ಬೇರು -

ಪೋಷಿಸೆ ಚಿಗುರ ನಿರುಮ್ಮಳ, ನಿರಾತಂಕ ||

ಧನ್ಯವಾದಗಳೊಂದಿಗೆ 

ನಾಗೇಶ ಮೈಸೂರು