ನೂರಾರು ಕದ ತೆರೆದು

ಬಿಟ್ಟುಕೊಳುತಿರು ಬೆಳಕು

ನುಗ್ಗಿ ಬರುತಿರಲಿ ಸಗಾಳಿ

ಒಳಗಾವರಿಸೆಲ್ಲ ಕಣಕಣದೆ ||

ಮುಚ್ಚುವುದೇಕೊ ಮನಸಾ

ಬಿಚ್ಚೆ ಕೋಶದಗಣಿತ ಪಟಲ

ಜೀವದುಸಿರುಸಿರ ಆಯಾತ

ಕೊಳೆ ಕಶ್ಮಲ ತೊಳೆ ನಿರ್ಯಾತ ||

ಕಾಣದ ಕೋಶದಡಿ ತಾಣ

ತಾವಿಗಿದೆ ಅಪಾರ ವಿಸ್ತಾರ

ತುಂಬಿದಂತೆಲ್ಲ ತಣಿದು ಹಿಗ್ಗಿ

ಹೊಸತ ಬರಮಾಡೊ ಚತುರ ||

ಎಚ್ಚರ ತೆರೆದ ಕಿಟಕಿ, ಕದ

ಕದ್ದು ಬಹ ಬೇಡದ ಭೂತ

ಪಂಚಭೂತಗಳ ವಿಕೃತಿಸಿ

ತಾಮಸ ಲೇಪಿಸೊ ಕುಟಿಲ ||

ತುಂಬಲಿ ಸಾತ್ವಿಕ ಶಕ್ತಿ

ರಾಜಸವಾಗಲಿ ವಿಭಕ್ತಿ

ದ್ಯುತಿ ಸುತ್ತೆರಡು ತಮವ

ಬಂಧಿಸಲಿ ಸರಿ ಸತ್ವ ತತ್ವ ||

ಧನ್ಯವಾದಗಳೊಂದಿಗೆ 

ನಾಗೇಶ ಮೈಸೂರು