ಈ ವರ್ಷದ ಬಾರಿ

ಚೀನಿ ಹೊಸ ವರ್ಷದ ಪ್ರಾಣಿ

ಮೇಕೆಯ ದರಬಾರು

ಆಡುಗಳದೂ ಸಹ-ಗಮನ ||

ಹಬ್ಬಕ್ಕಿರಬೇಕು ಔತಣ

ಶ್ಯಾವಿಗೆ ತರಕಾರಿ ಮಾಮೂಲು ಬಿಡಿ

ಸಾಸು ಕಲಚಿ, ಪುಡಿ ಎರಚಿ

ಅಡಿಗೆ ಮೀನು-ಮಾಂಸಾದಿ ಚಪ್ಪಡಿ ||

ವಾಹ್! ಕಲಾ ಪ್ರದರ್ಶನ..

ಜೋಡಿಸಿಟ್ಟಲಂಕರಣ ಜಾಗಟೆ ಸದ್ದು

ಸಂಪತ್ಸೂಚಿ ಕಣ್ಬಿಟ್ಟ ಮೀನುಟ್ಟು

ನಿರ್ಜೀವದಲು ಲವಲವಿಕೆ ದಿರಿಸು ||

ಕುರಿ, ಆಡು, ಮೇಕೆ, ಹೋತ

ಕೆಂಪು ಮಾಂಸ ಗಿರಾಕಿಗಳ ಜಾತ್ರೆ

ಸಿಪ್ಪೆಯಂತೆ ತರಿದು ಸುರುಳಿ

ಸುತ್ತಿದ ಕೆಂಪು ಸೀರೆಗು ಬಿಳಿ ಸೆರಗು ||

ನಿಲದಷ್ಟಕೆ ಭಕ್ಷ್ಯ ಭೋಜ್ಯ

ಸಾಗರೋತ್ಪನ್ನ ವರಹಾನಂದಿ ಜತೆಗೆ

ತರತರಾಕಾರ ಬೆಂದ ಪಕ್ವಾಪಕ್ವ

ಸೊಪ್ಪಾಡುವ ಸೂಪು, ಅನ್ನದ ಬಟ್ಟಲು ||

ಸೇರಿದೆ ಬಂಧು ಬಳಗವೆಲ್ಲ

ಮುನ್ನಾದಿನದ ಸಂಜೆಯಾ ಮಿಲನ

ಮೋಜಲಿ ನೆರೆದು ಮೇಜ ಸುತ್ತ

ಬಾಯ್ಕಡ್ಡಿಯಲೆತ್ತಿದೆತ್ತರ ವರ್ಷದುಡುಕು ||

ಧನ್ಯವಾದಗಳೊಂದಿಗೆ 

ನಾಗೇಶ ಮೈಸೂರು