ಅಂಗಳಕಿಂದು ಬಾರೋ ಕೃಷ್ಣಯ್ಯ

ಅಂಗಳಕಿಂದು ಬಾರೋ || ಪಲ್ಲವಿ ||


ತಿಂಗಳ ಮೊಗದ ಚೆನ್ನಿಗರಾಯನೇ

ಮಂಗಳವನ್ನು ತಾರೋ... || ಅನು ಪಲ್ಲವಿ ||


ಕಾಲಿಗೆ ಗೆಜ್ಜೆಯ ಕಟ್ಟಿ

ಹಾಲಿನ ಹೆಜ್ಜೆಯನಿಟ್ಟು

ಕುಣಿ ಕುಣಿದಾಡುತಾ ಬಾರೋ || ೧ ||


ಹಳದಿ ರೇಷಿಮೆ ಹೊದ್ದು

ಬಿಳಿಯ ಮುದ್ದೆಯ ಮೆದ್ದು

ಮುದ್ದಿನ ಮೊಗವನು ತೋರೋ || ೨ ||


ಚೆಂದದ ಹೂಗಳ ಧರಿಸಿ

ಚಂದನ ದೇಹಕೆ ಬಳಸಿ

ಗೋಗಳ ಒಲಿಸಲು ಬಾರೋ || ೩ ||


ಚಿಣ್ಣರ ಒಡನೆ ಮೆರೆದು

ಬಣ್ಣದ ಗೋಪಿಯರೆಳೆದು

ತುಂಟಾಟವಾಡಲು ಬಾರೋ || ೪ ||


ವಂಕಿಯ ತೋಳಿಗೆ ಹೇರಿ

ಬಿಂಕದ ನಗುವನು ಬೀರಿ

ಕೊಳಲನು ಊದಲು ಬಾರೋ || ೫ ||


ನವಿಲಗರಿಯನು ತೊಟ್ಟು

ಸವಿಯನು ಹರಿಯಲು ಬಿಟ್ಟು

ನಲಿ ನಲಿದಾಡುತಾ ಬಾರೋ || ೬ ||

--ಶ್ರೀ