ಯಾವ ಟಿವಿ ಕಾರ್ಯಕ್ರಮ ನಿಮಗಿಷ್ಟ?

___LINK_OPEN_ href="http://4.bp.blogspot.com/_PU7BmR35lao/S1Ot89xAkfI/AAAAAAAABPU/FnbpG7oKaBg/s1600-h/tv.jpg"___

ಡಿ ಟಿ ಎಚ್ ಅಥವಾ ಕೇಬಲ್ ಟಿವಿ ಸೇವೆ ಮೂಲಕ ಟಿವಿ ಕಾರ್ಯಕ್ರಮಗಳನ್ನು ಪಡೆಯುವವರಿಗೆ,ಯಾವ ಕಾರ್ಯಕ್ರಮಗಳು ಯಾವ ಚಾನೆಲ್‌ನಲ್ಲಿ ಬರುತ್ತಿವೆ,ಯಾವುದು ತಮಗಿಷ್ಟವಾದುವು ಎಂದು ನಿರ್ಧರಿಸಲು ಸುಲಭವಾಗಿಸುವ ಅಂತರ್ಜಾಲ ಸೇವೆಯು http://whatsonindia.com ತಾಣದಲ್ಲಿ ಲಭ್ಯವಿದೆ. ಯಾವ ಡಿಟಿಎಚ್ ಸೇವೆಯ,ಯಾವ ಸೇವೆಗೆ ಚಂದಾದಾರರಾಗಿದ್ದೀರಿ,ಯಾವ ಭಾಷೆಯ ಕಾರ್ಯಕ್ರಮ ಎಂದು ನಿಗದಿ ಪಡಿಸಿ,ತಾರೀಕನ್ನು ನೀಡಿದರೆ ಸರಿ,ಕಾರ್ಯಕ್ರಮಗಳು ಚಾನೆಲ್ ಅನುಸಾರ ಪಟ್ಟಿ ಮಾಡಿ ವೇಳಾ ಪಟ್ಟಿ ನಿಮ್ಮ ಮುಂದೆ ಪ್ರತ್ಯಕ್ಷವಾಗುತ್ತದೆ.ವಿವಿಧ ಚಾನೆಲ್‌ಗಳು ಬೇರೆ ಬೇರೆ ಹೊತ್ತಿನಲ್ಲಿ ಪ್ರಸಾರ ಮಾಡುವ ಕಾರ್ಯಕ್ರಮ ವಿವರಗಳು ಲಭ್ಯವಾಗುವುದರಿಂದ,ಅವುಗಳನ್ನು ಹೋಲಿಸಿ ನೋಡಿ ನಿರ್ಧರಿಸುವುದು ಸುಲಭ.ಯಾವುದೇ ಕಾರ್ಯಕ್ರಮವನ್ನು ನೋಡಬೇಕು ಎಂದು ನಿರ್ಧರಿಸಿದರೆ,ಅದನ್ನು ನೆನಪಿಟ್ಟುಕೊಳ್ಳಬೇಕಾದ ತಾಪತ್ರಯವೂ ಇಲ್ಲ.ತಾಣದಲ್ಲಿ ನೋಂದಾಯಿಸಿಕೊಂಡು,ನಿಮ್ಮ ಮೊಬೈಲ್ ಸಂಖ್ಯೆ ನೀಡಿದರೆ,ಕಾರ್ಯಕ್ರಮದ ಮೂಂಚಿತವಾಗಿ ನಿಮಗೆ ಎಸೆಮ್ಮೆಸ್ ಕಳುಹಿಸುವ ಸೇವೆಯೂ ಇಲ್ಲಿದೆ.ಬೇಕೆಂದರೆ,ನಿಮ್ಮ ಗೆಳೆಯರ ಮೊಬೈಲ್ ನೀಡಿ,ಅವರಿಗೂ ಎಸೆಮ್ಮೆಸ್ ಕಳುಹಿಸಿ,ಅವರಿಗೂ ಕಾರ್ಯಕ್ರಮದ ಬಗ್ಗೆ ತಿಳಿಸಬಹುದು.
------------------------------------------------------------------
ಪರ್ಯಾಯ ಶೀರೂರು ಮಠ ಅಂತರ್ಜಾಲದಲ್ಲಿ

___LINK_OPEN_ href="http://1.bp.blogspot.com/_PU7BmR35lao/S1OtBYruWGI/AAAAAAAABPI/ngKAIIrz1dk/s1600-h/udupi.jpg"___

ಉಡುಪಿ ಕೃಷ್ಣ ಮಠದ ಆಡಳಿತ ಸೂತ್ರವನ್ನು ವಹಿಸಲಿರುವ ಶ್ರೀಶೀರೂರು ಮಠದ ಅಂತರ್ಜಾಲ ತಾಣವೀಗ http://udupishiroormutt.inನಲ್ಲಿ ಲಭ್ಯ.ಶ್ರೀಮಠದ ಹಿನ್ನೆಲೆ,ಯೋಜನೆಗಳು,ಬರಹಗಳು,ಗುರು ಪರಂಪರೆ ಇತ್ಯಾದಿ ವಿವರಗಳು ಇಲ್ಲಿ ಸಿಗುತ್ತವೆ.ದೇವಾಲಯ ಮತ್ತು ಮಠದ ಚಿತ್ರಸಂಗ್ರಹವೂ ಇಲ್ಲಿದೆ.
ಪರ್ಯಾಯ ಪೂರೈಸುತ್ತಿರುವ ಶ್ರೀಪುತ್ತಿಗೆ ಮಠದ ಅಂತರ್ಜಾಲ ತಾಣವು http://www.puthigeshree.orgನಲ್ಲಿ ಸಿಗುತ್ತದೆ.ಪ್ರಸಕ್ತ ಪರ್ಯಾಯದಲ್ಲಿ ಹಮ್ಮಿಕೊಂಡ ಯೋಜನೆಗಳು,ಅವುಗಳಿಗೆ ನೆರವು ನೀಡುವುದು ಹೇಗೆ ಇತ್ಯಾದಿ ವಿವರಗಳ ಸಹಿತ,ಮಠದ ಹಿನ್ನೆಲೆ,ಚಿತ್ರಗಳು,ಬರಹಗಳು ಇಲ್ಲಿವೆ.ದೇಶ ವಿದೇಶಗಳ ಭಕ್ತಾದಿಗಳಿಗೆ ಅಂತರ್ಜಾಲತಾಣಗಳು ಮಾಹಿತಿಯನ್ನು ಪಡೆದುಕೊಳ್ಳಲು ಸಹಕಾರಿಯಾಗಿವೆ.ಸಹಾಯಹಸ್ತ ನೀಡುವವರು ಆನ್‌ಲೈನ್ ಮೂಲಕ ಪಾವತಿ ಮಾಡಲು ಅವಕಾಶ ಕಲ್ಪಿಸಿದರೆ ಚೆನ್ನ.
----------------------------------------------------------------------
ಹೈಟಿ ಭೂಕಂಪ:ಅಂತರ್ಜಾಲವೇ ಸುದ್ದಿ ಮೂಲ
ಹೈಟಿಯನ್ನು ನಡುಗಿಸಿ,ಅಂದಾಜು ಒಂದು ಲಕ್ಷ ಜನರನ್ನು ಬಲಿ ತೆಗೆದುಕೊಂಡಿರುವ ಭೂಕಂಪದ ಬಗ್ಗೆ ಸ್ಪಷ್ಟ ಚಿತ್ರವನ್ನು ಪಡೆಯಲು ಅಂತರ್ಜಾಲವು ಬಹಳ ನೆರವಾಗಿದೆ.ಟ್ವಿಟರ್,ಫೇಸ್‌ಬುಕ್ ತಾಣಗಳ ಮೂಲಕ ಜನರು ತಮ್ಮ ಬಂಧು-ಬಾಂಧವರು ಭೂಕಂಪದಿಂದ ಬಾಧಿತರಾಗಿದ್ದಾರೋ ಎಂದರಿಯಲು ಪ್ರಯತ್ನಿಸುತ್ತಿದ್ದರು.ಟ್ವಿಟರ್ ತಾಣದಲ್ಲಿ ಭೂಕಂಪ ಮತ್ತು ಹೈಟಿ ವಿಷಯಗಳು ಹೆಚ್ಚು ಚರ್ಚಿತವಾಗುತ್ತಿದ್ದುವು.ಗೂಗಲ್ ಭೂಕಂಪ ಪೀಡಿತ ಪ್ರದೇಶದ ಹೊಸ ಉಪಗ್ರಹ ಚಿತ್ರವನ್ನು ತೆಗೆದು,ಭೂಕಂಪದ ತೀವ್ರತೆಯನ್ನು ಜನರಿಗೆ ಮನದಟ್ಟು ಮಾಡಿಕೊಟ್ಟಿತು.ಭೂಕಂಪ ಪೀಡಿತರ ನೆರವಿಗೆ ಧನಸಹಾಯಕ್ಕೆ ಆಪಲ್ ಕಂಪೆನಿಯು ತನ್ನ ಐಸ್ಟೋರ್ಸ್ ಮೂಲಕ ಅನುಕೂಲ ಕಲ್ಪಿಸಿದಂತೆ,ಇತರ ಕಂಪೆನಿಗಳು ಜನರು ಆನ್‌ಲೈನ್ ಪಾವತಿ ಮೂಲಕ ನೆರವಾಗಲು ಅನುಕೂಲ ಕಲ್ಪಿಸುತ್ತಿವೆ.ಬ್ಯಾಂಕುಗಳೂ ಅಂತಹ ಪಾವತಿಗೆ ಗೇಟ್‌ವೇಗಳನ್ನು ತೆರೆದು,ನೆರವಾಗಲು ಕೋರಿಕೆಗಳು ಬರುತ್ತಿವೆ.
---------------------------------------------------------
ಚೀನಾದ ಅಂತರ್ಜಾಲ ಸೆನ್ಸಾರ್ ಧಿಕ್ಕರಿಸಿದ ಗೂಗಲ್
ಚೀನಾದಲ್ಲಿ ಅಂತರ್ಜಾಲದ ಬಗ್ಗೆ ಬಿಗಿ ಸೆನ್ಸಾರ್ ನೀತಿ ಅನುಸರಿಸಲಾಗುತ್ತಿದೆ.ಗೂಗಲ್ ಮೂಲಕ ಶೋಧಿಸಿದಾಗ,ಅದು ತೋರುವ ಅಂತರ್ಜಾಲ ಪುಟಗಳು ದಲಾಯಿಲಾಮ ಬಗ್ಗೆ ಇದ್ದರೆ,ಸರಕಾರದ ವಿರುದ್ಧ ಬರಹಗಳನ್ನು ಹೊಂದಿದ್ದರೆ,ಅಶ್ಲೀಲ ಮಾಹಿತಿ-ಚಿತ್ರ-ವಿಡಿಯೋ ಹೊಂದಿದ್ದರೆ,ಅಂತಹ ವಿವರಗಳನ್ನು ತೆಗೆದು,ಉಳಿದವನಷ್ಟೇ ಚೀನೀಯರಿಗೆ ಒದಗಿಸಬಹುದಿತ್ತು.ಅಂತಹ ಬಿಗಿ ಸೆನ್ಸಾರಿಗೆ ಗೂಗಲ್ ತನ್ನನ್ನು ಒಡ್ಡಿಕೊಂಡ ಕಾರಣ ಇದುವರೆಗೆ ಯಾವ ಸಮಸ್ಯೆಯೂ ಇರಲಿಲ್ಲ.ಆದರೀಗ ಗೂಗಲ್ ಅಂತಹ ಸೆನ್ಸಾರಿಗೆ ಒಳಗಾಗಲೂ ನಿರಾಕರಿಸಿ,ಬಿರುಗಾಳಿ ಎಬ್ಬಿಸಿದೆ.ಗೂಗಲ್ ವಿರೋಧ ಮುಂದುವರಿದರೆ, ಆ ತಾಣವನ್ನೇ ಚೀನಾ ಬಹಿಷ್ಕರಿಸುವ ಸಾಧ್ಯತೆ ಇದೆ.ಹಾಗೆ ಹೇಳಬೇಕೆಂದರೆ ಚೀನಾದಲ್ಲಿ ಗೂಗಲ್ ಅಂತಹ ಜನಪ್ರಿಯ ತಾಣವಲ್ಲ.ಶೋಧದ ಮಟ್ಟಿಗೆ ಚೀನಾ ತನ್ನದೇ ಆದ,ಬೈದು ಎನ್ನುವ ತಾಣವನ್ನು ಹೊಂದಿದೆ.ಇದು ಶೋಧ ಮಾರುಕಟ್ಟೆಯ ಶೇಕಡಾ ಅರುವತ್ತು ಪಾಲನ್ನು ಹೊಂದಿದ್ದರೆ,ಗೂಗಲ್ ಶೇಕಡಾ ಮೂವತ್ತು ಪಾಲನ್ನು ಪಡೆದು ಎರಡನೇ ಸ್ಥಾನಕ್ಕೆ ತೃಪ್ತಿ ಪಡಬೇಕಿದೆ.ಹಾಗಾಗಿ ಚೀನಾವು ಗೂಗಲ್ ಇಲ್ಲದಿದ್ದರೂ ಹೆಚ್ಚೇನೂ ಬಾಧಿತವಾಗದು.ಮೈಕ್ರೋಸಾಫ್ಟ್ ಕಂಪೆನಿಯು ಸದ್ಯಕ್ಕಂತೂ ಸೆನ್ಸಾರ್‌ಗೆ ಒಳಪಡಲು ಒಪ್ಪುವ ತನ್ನ ಹಿಂದಿನ ನಿರ್ಧಾರಕ್ಕೇ ಅಂಟಿಕೊಂಡಿದೆ.ಹಾಗಾಗಿ,ಗೂಗಲ್ ಚೀನಾದಿಂದ ಹೊರನಡೆಯಬೇಕಾಗಿ ಬಂದರೆ,ಅದರ ನಷ್ಟ ಗೂಗಲಿಗೇ ಹೊರತು ಚೀನಾಕ್ಕಲ್ಲ. ಈ ನಡುವೆ ಅಮೆರಿಕಾ ಅಧ್ಯಕ್ಷರು ಗೂಗಲಿನ ನಿರ್ಧಾರ ಸರಿಯೆಂದು ಬೆಂಬಲಿಸಿದ್ದಾರೆ.ಉಳಿದ ಕಂಪೆನಿಗಳೂ ಗೂಗಲಿಗೆ ಬೆಂಬಲ ಪ್ರಕಟಿಸುವ ಧೈರ್ಯ ತೋರಿದರೆ ಮಾತ್ರಾ ಚೀನಾ ತೊಂದರೆಗೆ ಸಿಕ್ಕಿಹಾಕಿಕೊಂಡೀತು.ಅಂದ ಹಾಗೆ ಗೂಗಲ್ ಚೀನಾದಲ್ಲಿ ಕಳೆದ ನಾಲ್ಕು ವರ್ಷಗಳಿಂದ ಲಭ್ಯವಿದೆ.ಗೂಗಲನ್ನು ಅಲ್ಲಿ ಸುಮಾರು ಐದು ಕೋಟಿ ಜನ ಬಳಸುತ್ತಿದ್ದಾರೆ.ಚೀನಾದಿಂದ ಗೂಗಲಿಗೆ ಸಿಗುತ್ತಿರುವ ಜಾಹೀರಾತು ಆದಾಯ ಕೂಡಾ ಕಡಿಮೆಯೇ.
--------------------------------------------------------
ಗ್ರಹಣದ ಪರಿಣಾಮಗಳನ್ನು ಅಧ್ಯಯನ ಮಾಡಲು ಇಸ್ರೋ ರಾಕೆಟ್
ಸೂರ್ಯಗ್ರಹಣದ ವೇಳೆ ವಾತಾವರಣದ ವಿವಿಧ ಪದರಗಳಲ್ಲಿ ಏನು ವ್ಯತ್ಯಾಸ ಆಗುತ್ತದೆ ಎನ್ನುವುದನ್ನು ಖಚಿತವಾಗಿ ತಿಳಿದುಕೊಳ್ಳಲು ಇಸ್ರೋ ರಾಕೆಟುಗಳನ್ನು ಉಡಾಯಿಸಿತು.ಶುಕ್ರವಾರ ಗ್ರಹಣದ ವೇಳೆ ಮತ್ತು ಹಿಂದಿನ ದಿನ ವಾತಾವರಣದ ವಿವಿಧ ಪದರಗಳನ್ನು ತಲುಪಿ ಮಾಹಿತಿ ಸಂಗ್ರಹಿಸುವ ಉದ್ದೇಶದಿಂದ ರಾಕೆಟುಗಳನ್ನು ಕಳುಹಿಸಿದ,ಇಸ್ರೋ ಸಾಮಾನ್ಯ ದಿನ ಮತ್ತು ಗ್ರಹಣದ ವೇಳೆ ವಾತಾವರಣದ ಉಷ್ಣತೆ,ಅಯಾನುಗಳ ಮಟ್ಟ ಇವುಗಳ ಮೇಲೆ ಬೆಳಕಿನ ಅಲೆಗಳ ಪರಿಣಾಮವನ್ನು ಅಭ್ಯಸಿಸಿತು.ಮೂರು ರಾಕೆಟುಗಳನ್ನು ಗುರುವಾರ ಕಳುಹಿಸಿದರೆ,ಐದು ರಾಕೆಟುಗಳು ಗ್ರಹಣದ ವೇಳೆ ಗಗನಗಾಮಿಯಾದುವು.ತುಂಬಾ ರಾಕೆಟ್ ಉಡಾವಣಾ ಕೇಂದ್ರ ಮತ್ತು ಶ್ರೀಹರಿಕೋಟಾ ಕೇಂದ್ರದಿಂದ ರಾಕೆಟುಗಳ ಉಡಾವಣೆ ನಡೆಯಿತು.ರಾಕೆಟುಗಳಲ್ಲಿದ್ದ ಹಲವು ಉಪಕರಣಗಳು ರಾಕೆಟು ಉರಿದು ಬೀಳುವ ಮುನ್ನ ಮಾಹಿತಿ ಸಂಗ್ರಹಿಸಿ,ಭೂಮಿಗೆ ರವಾನಿಸುವ ಏರ್ಪಾಡಾಗಿತ್ತು.ರೋಹಿಣಿ ಹೆಸರಿನ ರಾಕೆಟುಗಳು ಅರುವತ್ತು ಕಿಲೋಮೀಟರುಗಳಿಂದ ಹಿಡಿದು,ಐನೂರೈವತ್ತು ಕಿಲೋಮೀಟರುಗಳ ಎತ್ತರಕ್ಕೆ ಉಡಾವಣೆಯಾದುವು.
------------------------------------------------------------
ಮೊಬೈಲಿನಲ್ಲಿ ಶೋಧಕ್ಕೂ ಸಹಾಯ
ಮೊಬೈಲಿನಲ್ಲಿ ಗೂಗಲ್ ಮೂಲಕ ಶೋಧಿಸಲು ಪದಗುಚ್ಛಗಳನ್ನು ನೀಡುವ ಅಗತ್ಯವನ್ನೂ ಇಲ್ಲವಾಗಿಸಿ,ಗೂಗಲ್ ಶೋಧದಲ್ಲಿ ಹೊಸ ಸೇವೆ ನೀಡಲಾರಂಭಿಸಿದೆ.ಮೊಬೈಲ್ ಬಳಕೆದಾರನ ಸ್ಥಾನವನ್ನು ಗೊತ್ತು ಮಾಡಿಕೊಂಡು,ಆ ಊರಿನಲ್ಲಿ ಸಾಮಾನ್ಯವಾಗಿ ಯಾವುದಕ್ಕಾಗಿ ಜನ ಶೋಧಿಸುತ್ತಾರೆಂಬುದರ ಮಾಹಿತಿಯು ಗೂಗಲ್ ಪುಟ ತೆರೆದ ಕೂಡಲೇ ಬರುತ್ತದೆ.ಉದಾಹರಣೆಗೆ ಮ್ಯೂಸಿಯಂ ಇರುವ ಊರಿನಲ್ಲಿ ಅದರ ಬಗ್ಗೆ ಶೋಧ ನಡೆಸುವುದು ಸಾಮಾನ್ಯವಲ್ಲವೇ? ಈ ರೀತಿ ಕೆಲವು ಆಯ್ದ ಪದಗುಚ್ಛಗಳನ್ನು ನೀಡಿ,ಅವುಗಳ ಬಗ್ಗೆಯೇ ಶೋಧ ನಡೆಸಬಯಸುತ್ತಿದ್ದರೆ,ಅವುಗಳಲ್ಲಿ ಬೇಕಾದ್ದನ್ನು ಆಯ್ದುಕೊಳ್ಳಲು,ಅಲ್ಲವಾದರೆ ಬೇಕಾದ ಪದಗುಚ್ಛವನ್ನು ಟೈಪಿಸಲು ಬಳಕೆದಾರನಿಗೆ ಅವಕಾಶ ಸಿಗುತ್ತದೆ.
--------------------------------------------
ವಿಕಿಪೀಡಿಯಾ ಹತ್ತನೇ ವರ್ಷಕ್ಕೆ
ಜನವರಿ ಹದಿನೈದು ವಿಕಿಪೀಡಿಯಾ ದಿನವಾಗಿ ಆಚರಿಸಲ್ಪಡುತ್ತದೆ.2001ರಲ್ಲಿ ಆ ದಿನ ವಿಕಿಪೀಡಿಯಾ ಉದಯವಾಯಿತು.ಇಂಗ್ಲೀಷ್ ವಿಕಿಪೀಡಿಯಾದಲ್ಲಿ ಮೂರು ದಶಲಕ್ಷ ಬರಹಗಳಿವೆ.ಕನ್ನಡದ ವಿಕಿಪೀಡಿಯಾವೂ ಇದ್ದು,ಇದರಲ್ಲೂ ಏಳುಸಾವಿರ ಬರಹಗಳು ಸೇರಿಸಲ್ಪಟಿವೆ.ಜನರ ಸಹಭಾಗಿತ್ವದಲ್ಲಿ ಬೆಳೆಯುತ್ತಿರುವ ವಿಕಿಪೀಡಿಯಾದಲ್ಲಿ ಇನ್ನಷ್ಟು ಜನರು ಬರಹಗಳನ್ನು ಸೇರಿಸಿದರೆ ಚೆನ್ನ.

 


___LINK_OPEN_title="udayavani" href="http://www.udayavani.com/epaper/PDF//2010-01-18/Man18011006M.pdf" target="_blank"___udayavani

---------------------------------------------------------------------------

*ಅಶೋಕ್‌ಕುಮಾರ್ ಎ