ಸಂಪದದಲ್ಲಿ ಚಿಣ್ಣರಿಗೆಂದೆ ಬರುವ ಕನ್ನಡ ಬರಹಗಳು ಕಡಿಮೆಯೆಂದು ಕಾಣುತ್ತದೆ. ಏನಾದರೂ ಬರೆಯಲು ಯತ್ನಿಸಬೇಕು ಅಂದುಕೊಳ್ಳುತ್ತಿರುವಾಗಲೆ, ಸರಿಸುಮಾರು ಇಪ್ಪತ್ತೊಂದು ವರ್ಷದ ಹಿಂದೆ ಬರೆದಿದ್ದ ಈ ಮಕ್ಕಳ ಕವನ ಕಣ್ಣಿಗೆ ಬಿತ್ತು. ಅಂದ ಹಾಗೆ ಆ ದಿನಗಳಲ್ಲಿ 'ಬಾಲ ಮಂಗಳ'ದಲ್ಲಿ ಈ ಕವನ ಪ್ರಕಟವಾಗಿತ್ತು. ನನ್ನ ಹಳೆಯ ಕಡತಗಳ ಪ್ರಕಾರ ೧೫.ಆಗಸ್ಟ್.೧೯೯೨ ರ ಸಂಚಿಕೆಯಲ್ಲಿ (ನನ್ನಲ್ಲಿ ಆ ಸಂಚಿಕೆಯ ಪ್ರತಿಯಿಲ್ಲವಾಗಿ ತಾಳೆ ನೋಡಲು ಸಾಧ್ಯವಾಗಲಿಲ್ಲ). ಕನ್ನಡದ ಚಿಣ್ಣರಿಗೆ ಸರಾಗವಾಗಿ ಓದಲು ಆಗುವಂತೆ ಸರಳವಾಗಿದೆಯಾಗಿ 'ಕಾನ್ವೆಂಟು' ಕನ್ನಡ ಮಕ್ಕಳು ಹೆಚ್ಚು ತ್ರಾಸ ಪಡದೆ ಓದಬಹುದೆಂದುಕೊಳ್ಳುತ್ತೇನೆ - ಕನಿಷ್ಟ ಕನ್ನಡ ಬಲ್ಲ ಅಪ್ಪ, ಅಮ್ಮಂದಿರು ಓದಿಯಾದರೂ ಹೇಳಬಹುದು - ಅದರಲ್ಲೂ ಕನ್ನಡ ವಾತಾವರಣವಿರದ ಅನಿವಾಸಿ ಕನ್ನಡಿಗರ ಮಕ್ಕಳಿಗೆ :-)


ಕಲಿಯಲು  ಎಲ್ಲಿದೆ  ಬಿಡುವು?

---------------------------------------------------------

(೧೫.ಆಗಸ್ಟ್.೧೯೯೨ ರ 'ಬಾಲ ಮಂಗಳ' ದಲ್ಲಿ ಪ್ರಕಟಿತ)


ನಾನು ಪ್ರೈಮರಿ ಶಾಲೆ 

ಬರದು ಅಕ್ಷರ ಮಾಲೆ 

ನನಗೆ ನನ್ನದೇ ಜಗವು 

ಕಲಿಯಲು ಎಲ್ಲಿದೆ ಬಿಡುವು?                        || ೦೧ ||


ಆರಕೆ ಏಳಲು ಪೆದ್ದೆ?

ಬೆಳಗಿನ ಸಕ್ಕರೆ ನಿದ್ದೆ

ಗಂಟೆ ಬಾರಿಸೆ ಎಂಟೇ

'ದಢ ದಢ' ಶಾಲೆಗೇ ಹೊರಟೆ                          || ೦೨ ||


ಮೇಡಂ ಅಂದರು 'ಡಾಂಕಿ'

ಕೋಲಲಿ ಬಿಗಿದರು ಬಾಕಿ

'ಹೋಂ ವರ್ಕ್' ಬರೆಯದ ದಡ್ಡ 

ಬೆಂಚಿನ ಮೇಲಿರು ಹೆಡ್ಡ!                              || ೦೩ ||


ಅಂತೂ ಹೊಡೆಯಿತು ಗಂಟೆ 

ಸಧ್ಯ ! ತೀರಿತು ತಂಟೆ..

ಓಡುವೆ ಊಟಕೆ ಮೊದಲು 

ನಂತರ ಆಟದ ಬಯಲು..                            || ೦೪ ||


ಅಯ್ಯೋ! ಬರುತಿದೆ ನಿದ್ದೆ..

ಹಗಲಿದು ಕಳೆದರೆ ಗೆದ್ದೆ

ಯಾರಿಗೆ ಬೇಕಿ ಓದು 

ಬೇಡವೇ ಟಿವಿಯ ಜಾದೂ                            || ೦೫ ||


ಪಾಠವ ಬರೆಯುವ ಬದಲು 

ಟಿವಿಯ ನೋಡುವೆ ಮೊದಲು

ಊಟದ ನಂತರ ಪಾಠ 

ಬರೆದರೆ, ಮುಗಿಯಿತು ಕಾಟ!                        || ೦೬ ||


ಪುಸ್ತಕ ಹಿಡಿಯಲು ಎದ್ದೆ 

ಕಣ್ಣನು ಎಳೆದಿದೆ ನಿದ್ದೆ 

ಓದಲು, ಎಲ್ಲ ಮರೆವು

ಕಲಿಯಲು ಎಲ್ಲಿದೆ ಬಿಡುವು?                        || ೦೭ ||

 

‍‍‍‍ನಾಗೇಶ ಮೈಸೂರು