ವಾರದ ಹಿಂದೆ ನಡೆದ ಒಂದು ಘಟನೆ....

ವಾರದ ಹಿಂದೆ ಹಣ ವರ್ಗಾವಣೆ ಮಾಡಲೆಂದು ನಮ್ಮೂರಿಗೆ ಸಮೀಪದ ಬ್ಯಾಂಕಿಗೆ ಹೋಗಿದ್ದೆ.ನಾನು ಸ್ಲಿಪ್ ತುಂಬಬೇಕಾದರೆ ಇಳಿವಯಸ್ಸಿನ ಅಜ್ಜಿಯೊಬ್ಬರು ಕೈಯಲ್ಲಿ ಹಿಡಿದುಕೊಂಡಿದ್ದ ವಿಡ್ರಾವಲ್ ಸ್ಲಿಪ್ ತೋರಿಸಿ ಅದನ್ನು ತುಂಬಿಕೊಡುವಂತೆ ಕೇಳಿಕೊಂಡರು.ನಿಮಗೆ ಗೊತ್ತಿರಬಹುದು, ಈ ಬ್ಯಾಂಕುಗಳಲ್ಲಿ 'ಮೆ ಐ ಹೆಲ್ಪ್ ಯು'ಅಂತ ಬೋರ್ಡ್ ಹಾಕಿಕೊಂಡ ಹೆಲ್ಪ್ ಡೆಸ್ಕ್ ಇರುತ್ತದೆ.ದುರಂತವೆಂದರೆ ಇವರು ಮಾಡುವ ಹೆಲ್ಪ್ ಮಾತ್ರ ಲಕ್ಷ ಲಕ್ಷ ಡೆಪಾಸಿಟ್ ಮಾಡಿದವನಿಗೆ ಮಾತ್ರ ಮೀಸಲಿರುತ್ತದೆ.ಅಂಕಿ-ಅಕ್ಷರ ಗೊತ್ತಿಲ್ಲದವರನ್ನು ಇವರು ಒಂದು ರೀತಿಯಲ್ಲಿ ಅಸ್ಪೃಶ್ಯರಂತೆ ಕಾಣುತ್ತಾರೆ.ಬ್ಯಾಂಕುಗಳಲ್ಲಿ ಅಲ್ಲಿನ ಉದ್ಯೋಗಿಗಳು ತಮ್ಮ ಗ್ರಾಹಕರಿಗೆ ಮಾಡುವ ಸಹಾಯಕ್ಕಿಂತ ಹೆಚ್ಚಿನ ಸಹಾಯವನ್ನು ಅಲ್ಲಿಗೆ ಬಂದ ಬೇರೊಬ್ಬ ಗ್ರಾಹಕ ಮಾಡುತ್ತಾನೆ ಎಂಬುದು ವಾಸ್ತವ ಸತ್ಯ.ಅಜ್ಜಿ ಅವರ ಪಾಸ್ಬುಕ್ ಕೊಟ್ಟು ಸಾವಿರ ರೂಪಾಯಿ ಬಿಡಿಸಿಕೊಡು ಎಂದರು.. ಮತ್ತೆ ಏನೋ ನೆನಪಾದವರಂತೆ,ಇಲ್ಲ...ನನಗೆ ಒಂದುವರೆ ಸಾವಿರ ಬೇಕಿತ್ತು ಎಂದರು.ನಾನು ಅಷ್ಟೋತ್ತಿಗಾಗಲೆ ಸ್ಲಿಪ್ ತುಂಬಿಸಿಯಾಗಿತ್ತು.ಮತ್ತೆ ಹೊಸ ಸ್ಲಿಪ್ ತಗೊಂಡರಾಯಿತು ಅಂದುಕೊಂಡು ಹಳೆ ಸ್ಲಿಪನ್ನು ಬಿಸಾಡಲು ಕಸದಬುಟ್ಟಿಗಾಗಿ ಕಣ್ಣಿಗೆ ಕಾಣಿಸಿದ ಎಲ್ಲಾ ಮೂಲೆಯಲ್ಲೂ ಹುಡುಕಾಡಿದೆ.ನನಗೆ ಅಲ್ಲೆಲ್ಲ ಕಸ ಕಾಣಿಸಿತೇ ಹೊರತು ಬುಟ್ಟಿ ಮಾತ್ರ ಕಾಣಿಸಲಿಲ್ಲ.ಮ್ಯಾನೆಜರ್ ಗೆ ದೂರು ಕೊಡೋಣವೆಂದು ಅವರ ಕ್ಯಾಬಿನ್ ಕಡೆ ನೋಡಿದೆ ಅಲ್ಲಿ ಅವರ ನೇಮ್ ಬೋರ್ಡ್ ಇತ್ತು ಅವರಿರಲಿಲ್ಲ.ಅಲ್ಲೇ ಯಾವುದೋ ಫೈಲಿನ ಹಾಳೆ ತಿರುವಿ ಹಾಕುತ್ತಿದ್ದ ಪಿಯೋನರನ್ನು ಕುರಿತು,' ಸ್ವಾಮಿ,ಇಷ್ಟು ದೊಡ್ಡ ಬ್ಯಾಂಕಿನಲ್ಲಿ ಒಂದು ಕಸದಬುಟ್ಟಿಗೆ ಬರವೇ'ಎಂದು ಕೇಳಿದೆ.ಅದಕ್ಕವರು,'ಮೊದಮೊದಲು ನಾವೂ ಕಸದಬುಟ್ಟಿ ಇಡುತ್ತಿದ್ದೆವು.ಆದರೆ ಗ್ರಾಹಕರು ಬುಟ್ಟಿಯೊಂದನ್ನು ಬಿಟ್ಟು ಬೇರೆಲ್ಲ ಕಡೆ ಕಸಹಾಕುತ್ತಿದ್ದರು, ಇನ್ನು ಕೆಲವರು ತಾವು ಬಾಯಿಗೆ ಹಾಕಿಕೊಂಡು ಬಂದ ತಂಬಾಕು ಗುಟ್ಕಾ ಎಲೆಅಡಿಕೆಯ ರಸವನ್ನು ಅದಕ್ಕೆ ಉಗಿಯುತ್ತಿದ್ದರು,ಮತ್ತೆ ಕೆಲವರು ತಮ್ಮ ಮಕ್ಕಳು ತಿಂದು ಮುಗಿಸಿದ ಚಾಕಲೇಟ್ ಲೇಸ್ ಕುರ್ಕುರೆಯ ಪ್ಲಾಸ್ಟಿಕ್ ಕವರ್ ಗಳನ್ನು ಹಾಕುತ್ತಿದ್ದರು.ಇದನ್ನು ಗಮನಿಸಿದ ನಮ್ಮ ಮ್ಯಾನೆಜರ್ ಗ್ರಾಹಕರು ಮಾಡುವ ತೀರ ವೈಯಕ್ತಿಕ ಕಸಗಳಿಗೆ ನಮ್ಮ ಬ್ಯಾಂಕ್ ಯಾಕೆ ಬುಟ್ಟಿಯಾಗಬೇಕೆಂದು ಭಾವಿಸಿ ಅದನ್ನು ತೆರವುಗೊಳಿಸಿದ್ದಾರೆ ಎಂದು ಸಮರ್ಥನಿಯವಾದ ಉತ್ತರ ಕೊಟ್ಟರು.ನನ್ನ ಬಳಿ ಅವರ ಉತ್ತರಕ್ಕೆ ಮರುಪ್ರಶ್ನೆಯಿರಲಿಲ್ಲ.ಪಿಯೋನರ ಮಾತು ಕೇಳಿದ ನಂತರ ನನಗನ್ನಿಸಿದ್ದು, ಭಾರತ ಮೊದಲು ಕಾಗದ ಮತ್ತು ಪ್ಲಾಸ್ಟಿಕ್ ಮುಕ್ತ ಆಗಬೇಕು.ಆಗ ಮಾತ್ರ ಕಸಮುಕ್ತ ಸ್ವಚ್ಛ ಭಾರತ ಸಾಧ್ಯವೆಂಬುದು.

-@ಯೆಸ್ಕೆ