ನಮಗನ್ನ ನೀಡಿ ತಾ ಗಂಜಿ ಕುಡಿವನು

ಒಪ್ಪತ್ತು ಗಂಜಿಗೆ ದಿನವೆಲ್ಲಾ ದುಡಿವನು;


ಆರು ತುಂಬಿಹುದು ಮಕ್ಕಳಿಬ್ಬರಿಗೂ

ಹಣ್ಣ ಸವಿದಿಲ್ಲ, ಶಾಲೆ ಕಂಡಿಲ್ಲ;


ಹಗಲಲ್ಲಿ ಕೆಲಸ ರಾತ್ರಿಯಲಿ ಚಿಂತೆ

ಹೆಂಡತಿಯೂ ಸೋತಿಹಳು ಅವನಂತೆ;


ಸಂಕ್ರಾಂತಿ-ಯುಗಾದಿಗೊಮ್ಮೆ ಹಬ್ಬ

ಆಗ ಅಕ್ಕಿಪಾಯಸ ಸಿಕ್ಕರೆ ಅಬ್ಬಬ್ಬ !


ಬಡತನವೇ ಅವನಿಗೆ ಪಿತ್ರಾರ್ಜಿತ ಆಸ್ತಿ

ಬಡತನವೇ ಮಕ್ಕಳಿಗೂ ಕಟ್ಟಿಟ್ಟ ಬುತ್ತಿ;


ನೀವಿಂತು ಬಳಲುತಿರೆ ಪೇಟೆಯೊಳು ಶೋಕಿ

ಸರ್ಕಾರವು ಎಂದೂ ನಗರಿಗಳ ಪೈಕಿ;


ನೀನೀಡಿದನ್ನ ಸೇವಿಸುವ ಮುನ್ನ

ವಂದಿಪೆನು ರೈತ ನಿನ್ನ ಪಾದಗಳ ನಾ


ಅನುಪ್ ಮಲೆನಾಡು

[೭ ಸೆಪ್ಟೆಂಬರ್ ೨೦೦೮]