ನಿನ್ನ ನಿರೀಕ್ಷೆಯಲ್ಲಿ
ಆಗುಂಬೆ ಘಾಟಿನ ತುತ್ತ ತುದಿಯಲ್ಲಿ ನಿಂತಿರುವೆ
ಅಲ್ಲಿ ನಾನೇ ಎತ್ತರ, ನನ್ನ ಮೀರಿಸುವವರು ಇಲ್ಲ.
ದೂರದ ಪಡುವಣದಲ್ಲಿ ಸಮುದ್ರದ ಅಲೆಗಳು
ಸೂರ್ಯನು ಹೊಂಬಣ್ಣ ಬಳಿದು ಹೊರಟನಲ್ಲ.

ಗಾಳಿ ಬೀಸುತ್ತಿದೆ ನೋಡಿ ನನ್ನ  ಬೀಳಿಸುವ ಹಾಗೆ
ಎರಡು ಬಾಹುಗಳ ತೆರೆದು ಆದಿತ್ಯನ ಕಡೆ ನೋಡಿದೆ.
ಬೇಡಿದೆ ತುಂಬು ಬಾಹುವ, ಬರಿದಾದ ನನ್ನ ಮನವ
ದಿನಕರ ಕರಗಿ ಮರೆಯಾದ, ನನ್ನ ಕೋರಿಕೆ ಕೇಳದೆ.

ಬಾನ ಹೊಂಬಣ್ಣವು ರಕ್ತ ಚೆಲ್ಲಿದಂತೆ ಕೆಂಪಾಯಿತು
ದಿಗಂತದಂಚಿನಲ್ಲಿ ಕಪ್ಪು ಅಲೆಯು ನುಸುಳಿ ಬಂದಿತು.
ತೆರೆದ ನನ್ನ ಬಾಹುಗಳು ತೆರದೇ ಇವೆ, ಬರಿದಾಗಿವೆ
ಪ್ರಕೃತಿಯ ನಡುವೆ, ಖಾಲಿಯಾದೆ ಎಂದು ಅನಿಸಿತು.

ಓ ನನ್ನ ಚೇತನ! ಮುಗುಳು ನಗುತ್ತಾ ಬಾ, ಈಗಲೇ
ನನ್ನ ಜಡ ಕಣ ಕಣಗಳಲ್ಲಿ ನವ ಚೈತನ್ಯವ ಹರಿಸು.
ನಾನು ಬೀಳುತ್ತಿರುವೆ ಅಂತ್ಯವಿಲ್ಲದ ಕತ್ತಲ ಕಮರಿಗೆ
ಹಿಡಿದುಕೋ, ಎತ್ತಿಕೋ, ನಿನ್ನೆದೆಗೆ ನನ್ನನಪ್ಪಿ ಹರಸು.

-------

ನಾ.ಸೋಮೇಶ್ವರ

___LINK_OPEN_href="http://wallpepper.files.wordpress.com/2007/11/balda_orange_sunset_alps.jpg"___http://wallpepper.files.wordpress.com/2007/11/balda_orange_sunset_alps.jpg