ಬೇಕಾಗುವ ಸಾಮಗ್ರಿಗಳು :

ಒಣ ಮೆಣಸಿನ ಕಾಯಿ ೨೬

ಕೊತ್ತಂಬರಿ ಬೀಜ ೧ ಚಟಾಕು

ಮೆಣಸು ೧ ಚಟಾಕು

ಜೀರಿಗೆ ೧ ಚಟಾಕು

ಕಡಲೆಬೇಳೆ ೧ ಚಟಾಕು

ಉದ್ದಿನ ಬೇಳೆ ೧ ಚಟಾಕು

ಸಾಸುವೆ ೧/೨ ಚಟಾಕು

ಮೆಂತ್ಯ ೧/೪ ಚಟಾಕು

ಅರಿಸಿನದ ಕೊನೆ ೨

 

ಮಾಡುವ ವಿಧಾನ :  ಮೆಣಸಿನ ಕಾಯನ್ನು ತೊಟ್ಟು ತೆಗೆದು ೨ ಭಾಗ ಮಾಡಿ ಬಾಣಲೆಗೆ ಒಂದು ಸ್ಪೂನ್ ಎಣ್ಣೆ ಹಾಕಿ ಹುರಿದು ಬೇರೆ ಪಾತ್ರೆಗೆ ಹಾಕಿ.  ಪುನಃ ಒಂದು ಸ್ಪೂನ್ ಎಣ್ಣೆ ಹಾಕಿ, ಕೊತ್ತಂಬರಿ ಬೀಜವನ್ನು ಹುರಿದು ಅದನ್ನು ಪಾತ್ರೆಗೆ ಹಾಕಿ. ಉಳಿದ ಸಾಮಾನುಗಳನ್ನು ಎಣ್ಣೆ ಹಾಕದೆ ಹುರಿದು ಪಾತ್ರೆಗೆ ಹಾಕಿ.  ಅರಿಸಿನ ಒರಳಲ್ಲಿ ಕುಟ್ಟಿ ಉಳಿದ ಎಲ್ಲಾ ಸಾಮಾನುಗಳನ್ನು ಕುಟ್ಟಿ (ಕುಟ್ಟೋಕೆ ಶಕ್ತಿ, ಒರಳು ಇಲ್ಲದಿರುವವರು, ಮಿಕ್ಸಿಯಲ್ಲಿ ಪುಡಿ ಮಾಡಿಕೊಳ್ಳಿ) ಜರಡೆಯಾಡಿಕೊಳ್ಳಿ.  

ಪುಳಿಯೋಗರೆ ಮಾಡುವ ವಿಧಾನ :

ಒಂದು ಕಿತ್ತಲೆ ಹಣ್ಣಿನ ಗಾತ್ರದಷ್ಟು ಅಂದರೆ ಮೂಸಂಬಿ ಗಾತ್ರ (ಅಜ್ಜಿ ಹೀಗೆ ಬರೆದಿಟ್ಟಿರೋದು ;-) )ದಷ್ಟು ಹುಣಸೇ ಹಣ್ಣನ್ನು ಬಿಸಿ ನೀರಿಗೆ ಹಾಕಿ ಗೊಜ್ಜು ಶೋಧಿಸಿ ಅದನ್ನು ಬಾಣಲೆ ಅಥವಾ ಡಬರಿಯಲ್ಲಿ ಕುದಿಸಿ.  ಗಟ್ಟಿ ಆದಾಗ ಮೇಲೆಲ್ಲಾ ಹಾರಲು ಶುರುವಾಗುತ್ತದೆ.  ಆಗ ಒಂದು ಚಟಾಕು ಉಪ್ಪು, ನಿಂಬೇ ಹಣ್ಣಿನ ಗಾತ್ರದಷ್ಟು ಬೆಲ್ಲ, ೬ ಗರಿ ಕರಿಬೇವು ಹಾಕಿ, ಇಡ್ಲಿ ಹಿಟ್ಟಿನಂತೆ ಗಟ್ಟಿ ಆದಾಗ ಕೆಳಗಿಟ್ಟು ಬೇರೆ ಪಾತ್ರೆಯಲ್ಲಿ ೧/೨ ಪಾವು ಎಣ್ಣೆ, ೬ ಮೆಣಸಿನ ಕಾಯಿ, ಚೂರು ಸಾಸಿವೆ, ೧ ಸ್ಪೂನ್ ಕಡಲೆಬೇಳೆ, ಉದ್ದಿನ ಬೇಳೆ ಹಾಕಿ.  ಹದವಾಗಿ ಹುರಿದು ಅದನ್ನು ಆ ಹುಳಿಗೆ ಹಾಕಿ, ಮಾಡಿಟ್ಟುಕೊಂಡಿರುವ ಪುಡಿ ೧/೨ ಪಾವು ಅಳತೆ ಹಾಕಿರಿ.  ೧/೪ ಕೆ.ಜಿ ಬಿಳೀ ಎಳ್ಳು ಹುರಿದು ಕುಟ್ಟಿ ೧ ಪಾತ್ರೆಯಲ್ಲಿಡಿ.  ೧/೨ ಕೆ.ಜಿ. ಕಡಲೆಕಾಯಿ ಬೀಜ ಹುರಿದು ಬೇಳೆ ಮಾಡಿ ಇಟ್ಟುಕೊಳ್ಳಿ ಅಥವಾ ಎಣ್ಣೆಯಲ್ಲಿ ಹದವಾಗಿ ಕರಿಯಿರಿ.  ೧ ಕೊಬ್ಬರಿ ತುರಿದಿಟ್ಟುಕೊಂಡು ಅದನ್ನು ಪುಡಿಯಾಗಿ ಮಾಡಿ ಆರಿಸಿ ಗೊಜ್ಜು ಸ್ವಲ್ಪ, ಕೊಬ್ಬರಿ ತುರಿ, ಎಳ್ಳು ಪುಡಿ, ಕಡಲೆಕಾಯಿಯ ಬೀಜ ಸ್ವಲ್ಪ ಎಣ್ಣೆ ಹಾಕಿ ಕಲಸಿರಿ.  ಉಪ್ಪು ಸಾಲದಿದ್ದರೆ ಹಾಕಿ.

 

(ಉಸ್ಸಪ್ಪಾ! ಬರೆಯೋಕೆ ಸಾಕಾಯಿತು, ಇನ್ನು ಇದನ್ನು ಮಾಡೋದು ಹೇಗೆ? ನಾನು  ಯಾವತ್ತು ಇದನ್ನು ಈ ಅಳತೆಯಲ್ಲಿ ಮಾಡಿಲ್ಲ.  ಹಾಗಾಗಿ ಎಷ್ಟು ಜನರ ಊಟಕ್ಕೆ ಈ ಗೊಜ್ಜು ಅಂತಾ ಖಂಡಿತವಾಗಿಯೂ ಗೊತ್ತಿಲ್ಲ.  ಬಹುಶಃ ನನಗೆ ಸಣ್ಣ ಅನುಮಾನ, ಅಜ್ಜಿ ಯಾವುದಾದರೂ ಜಾತ್ರೆಗಾಗಿ ಈ ಅಳತೆ ಬರೆದಿಟ್ಟಿದ್ದಾರಾ? ಅಂತಾ.  ಮಾಡಿ ನೋಡಿ ಆನಂದಿಸಿ).