ಹಂಬಲ ಹಣತೆ (4) ಬುಗ್ಗೆ

ಚಿಮ್ಮುತ ನೆಗೆಯುವೆ,

ನೆಗೆಯುತ ಚಿಮ್ಮುವೆ,

ತುಂಬಿದ ಪಗಲೊಡನೋಕುಳಿ ಯಾಡುವೆ!

ಹಾರುತಲೇಳುವೆ,

ಏಳುತ ಬೀಳುವೆ-

ತಿಂಗಳ ಬೆಳಕಲಿ ನಲಿದುಲಿದಾಡುವೆ !

 

ಪಗಲಿರುಳೆನ್ನದೆ,

ಅಳಿವುಳಿವೆನ್ನದೆ,

ಏರುತಲೇರುತಲೇರುತಲಿರಯವೆ!

ಸಗ್ಗವ ಸೇರಲು

ನುಗ್ಗುತ ಬುಗ್ಗೆಯೆ

ಏರುತಲೇರುತಲೇರುತಲಿರುವೆ!

 

ಬಿತ್ತುವೆ ಬೆಳೆಯುವೆ,

ಸುತ್ತುವೆ ಸುಳಿಯುವೆ,

ಎತ್ತಲು ಮುತ್ತನು ಚಲ್ಲುತಲಿರುವೆ!

ಮೆರೆಯುವೆ ಮೊರೆಯುವೆ,

ಗುರಿಯನು ತೊರೆಯುವೆ-

ಮತ್ತದೋ - ಏರುತಲೇರುತಲಿರುವೆ!

ಆವುದು ತಗ್ಗಿಸ

ದಾವೇಗವು ತಾ,

ತುಂಬಿಹುದಾಗಳು ಬುಗ್ಗೆಯೆ ನಿನ್ನೊಳು!

 

ಭಾವಿಸೆ ಬಗೆಬಗೆ

ಯಾಗುವೆ- ಆದರು

ಎಂದಿನ ತೆರದೊಳೆ ನೀನಿರುತಿರುವೆ!

ಗೆಲುವಿನ ಬುಗ್ಗೆಯೆ,

ಚೆಲುವಿನ ಸುಗ್ಗಿಯೆ,

ನಿನ್ನಂತೆನ್ನೆದೆ ಹಾರುತಲಿರಲೀ!

ಏಳಿನ ಬೀಳಿನ

ಬಾಳನು ಬಗೆಯದೆ,

ನನ್ನಿಯೊಳೇರುತಲೇರುತಲಿರಲೀ!

 

 

ಜೇಮ್ಸ್ ರುಸ್ಸೆಲ್ ಲೋವೆಲ್ (1819-1881) ರಚಿಸಿದ 'ದ ಫೌಂಟೇನ್' ಎಂಬ ಕವಿತೆಯ ಭಾವಾನುವಾದ.