ಆಧ್ಯಾತ್ಮದ ಕಡಗೋಲಲ್ಲಿ

ಕಡೆಯುತ್ತಿರುವೆನು ಮನೋಸಾಗರವನೀಗ

ಅನವರತ ಅಭ್ಯಾಸದಲ್ಲಿ

ಕಡಿಮೆಯಾಗುತ್ತಿರುವುದು ಇಂದ್ರಿಯದ ವೈಭೋಗ

ಕಾಣದ ಪದರಗಳ ಅನಾವರಣ,

ಮೌನದಿ ಮನಸ್ಸಿನ ಒಳ ಹೊಕ್ಕಾಗ

ಎಂದೂ ಕೇಳದ ನಾದಗಳ ಶ್ರವಣ,

ಧ್ಯಾನದಿ ಅನಾಹತ ತೆರೆದಾಗ

ಮಲಗಿದ್ದ ಕುಂಡಲಿನಿಯು ಎದ್ದು ಬುಸುಗುಡುತ್ತ

ಸೀಳಿ ಷಟ್ಚಕ್ರಗಳ, ಸಾಗಿದೆ ಸಹಸ್ರಾರದತ್ತ

ಸುಸ್ಪಷ್ಟ ತೇಜೋಮಯ ಕಿರಣ,

ಗೋಚರ ಆಜ್ಞೆಯ ಕಣ್ಣಲ್ಲಿ ಕಂಡಾಗ

ಆ ಬೆಳಕಿನ ಮೇಲೆಯೇ ಧಾರಣ,

ಆಗಿದೆ ಸಮಾಧಿ ಧ್ಯಾನದಿ ಮೈಮರೆತಾಗ

ಜೀವ ಬ್ರಹ್ಮನ ಜೊತೆ ಸೇರಿ ನಲಿಯುತ್ತ

ಒಡೆದು ಪುಡಿಯಾಗಿದೆ, ಕಟ್ಟಿಕೊಂಡಿದ್ದ ಬಂಧನದ ಹುತ್ತ

-ಕೆಕೆ (ಕೀರ್ತನ್ ಕೆ)