ಹಿತವೆನಿಸುವ ಈ ಮಳೆಗಾಲದ ಹವಮಾನವು

ಮರುಕಳಿಸಿದೆ ಕಳೆದುಕೊಂಡ ಮಧುರ ಭಾವವು

ಆಕಾಶದಿಂದ ಸೋರುವ ಹನಿಯ

ಹಿಡಿದಿಡುವ ಭೂಮಿಯ ಪರಿಯ

ನೋಡಲು ಸಾಲದೆ ಹೋಯಿತು ಈ ಎರಡು ಕಣ್ಣು

ತೆರೆಯಲು ಶುರುವಾಯಿತು ಕವಿಯ ಮೂರನೆ ಕಣ್ಣು

ಎಲೆ ತುದಿಯಲ್ಲಿ ಜೋತಾಡುವ ಇಬ್ಬನಿಯ

ಹೊಳೆವಂತೆ ಮಾಡುವ ಮೂಡಣದ ರವಿಯ

ಸೆರೆಹಿಡಿಯಲು ಕಾದಿದೆ ಇರುವ ಎರಡು ಕಣ್ಣು

ಕಣ್ಮುಚ್ಚಿದರೂ ನೋಡುತ್ತಲಿದೆ ಕವಿಯ ಮೂರನೆ ಕಣ್ಣು

ಹಸಿರು ಸೀರೆಯ ಉಟ್ಟು ಮೆರೆವ ಪ್ರಕೃತಿಯ

ತುಂಬಿ ಹರಿಯುತ್ತಿರುವ ನೀರಿನ ಝರಿಯ

ನೋಡುತ್ತ ಅನುಭವಿಸುತ್ತಿದೆ ಹೊರಗಿನ ಎರಡು ಕಣ್ಣು

ಸೃಷ್ಟಿಯ ವಿಸ್ಮಯಕ್ಕೆ ವಿಕಸನಗೊಂಡಿದೆ ಕವಿಯ ಮೂರನೆ ಕಣ್ಣು

-ಕೆಕೆ (ಕೀರ್ತನ್ ಕೆ)