ಅರಿಯಲಾಗದೋ ನಿನ್ನ ಹರಿಯೇ

ಅರಿಯಲಾಗದೋ...

ಬುದ್ಧಿಗೆ ಹಿಡಿದಿದೆ ತುಕ್ಕು

ಮನಸ್ಸಿಗೆ ಕವಿದಿದೆ ಮಂಕು

ದೇಹವಂತೂ ರೋಗಗಳ ಗುಂಪು

ಹೇಗೆ ಅರಿಯಲಿ ನಿನ್ನ ನಾನು

ಈ ವ್ಯರ್ಥ ಸಲಕರಣೆಯಿಂದಲೇನು ?

ಇಂದ್ರಿಯಗಳು ಓಡಿದೆ ಮಾಯೆಯ ಹಿಂದೆ

ಆಲೋಚನೆಗಳ ಆಟ ಮೋಹದ ಮುಂದೆ

ಚಿತ್ತ ಚಾಂಚಲ್ಯಕ್ಕೆ ಸಿಲುಕಿದೆಯಂತೆ

ಹೇಗೆ ಅರಿಯಲಿ ನಿನ್ನ ನಾನು

ಈ ವ್ಯರ್ಥ ಸಲಕರಣೆಯಿಂದಲೇನು ?

ಪುರಾಣವೂ ಬಲಹೀನವಾಗಿದೆ

ನಿನ್ನ ನೈಜ ರೂಪ ತೋರಲು

ಗೀತೋಪನಿಷತ್ತೂ ಸೋತಿದೆ

ನಿನ್ನ ಎಲ್ಲ ಗುಣ ಹೇಳಲು

ವೇದ ಶಾಸ್ತ್ರಗಳು ಸಾರಿ ಹೇಳಿದೆ

ನೀನು ಅರಿವಿಗೆ ಮೀರಿದವನೆಂದು

ಇನ್ಯಾವ ಉಪಕರಣವನ್ನು

ಉಳಿಸಿರುವೆ ನೀನು ನನಗಿಂದು ?

ಅರಿಯಲಾಗದೋ ನಿನ್ನ ಹರಿಯೇ

ಅರಿಯಲಾಗದೋ...

- ಕೆಕೆ (ಕೀರ್ತನ್ ಕೆ)