೧)

ಮನೆಯಲ್ಲಿದ್ದಾಗ ಅಮ್ಮನ ಕೈ ಅಡುಗೆ ,

ಹರಿವೆ ಬಸಳೆ ಅಲಸಂಡೆ !

ಬೆಂಗಳೂರು ಸೇರಿ ಹೆಂಡತಿ ಕೈ 'ಅಡಿಗೆ'

ಈಗ ಗರುಡ,ಫೋರಮ್ ,ಬರಿಸ್ತಾ  ಆಲ್ ಸಂಡೆ !! 

 

೨)

ಮೇಸ್ಟ್ರು ಹೇಳಿದ್ರು ,

ಕಾವ್ಯ ಕೃಷಿ ಮಾಡಿ

ಗುಂಡ ಕಣ್ಸನ್ನೆ ಮಾಡಿದ

ಕಾವ್ಯ , ಕೃಷಿ ಕಷ್ಟ ಕಣೆ ! 

 

೩)

ಹಿಂದೆ , 

ಹೆಂಡತಿಯೊಬ್ಬಳು ಮನೆಯೊಳಗಿದ್ದರೆ 

ನನಗದೆ ಕೋಟಿ ರುಪಾಯಿ !

ಈಗ ,

ಹೆಂಡತಿಯೊಬ್ಬಳು 'ಮನೆಯೊಳಗೇ'  ಇದ್ದರೆ

ನನಗದು  ಕೋಟಿ ಕೋಟಿ ರುಪಾಯಿ !!

 

೪)

ಹಿಂದೆ ಕೂಡು ಕುಟುಂಬ , ಮನಸು ದೊಡ್ಡದು

ತಾತ , ಅಪ್ಪ ಮಗ ಮೊಮ್ಮಗ ಒಂದೇ ಮನೆಯಲ್ಲಿ

ಇಂದು ಜಗತ್ತು ಚಿಕ್ಕದು, ಜೊತೆಗೆ ಮನಸ್ಸು ಕೂಡ

ಅಪ್ಪ ಆಫೀಸು , ಅಮ್ಮ ಫೆಮಿನಿಸ್ಟು, ಮಗಳು ಕಾನ್ವೆಂಟು ,ತಾತ ಒಬ್ಬನೇ ಮನೆಯಲ್ಲಿ !

(ಆಫೀಸ್ ಮದ್ಯಾನ್ಹ ದ ನಿದ್ದೆಯ ಹೊತ್ತಲ್ಲಿ ಬರೆಯುವ ಮನಸ್ಸಾಯ್ತು ಇನ್ದ್ಯಾಕೋ ! )