ಹುತ್ತ  
               - ಲಕ್ಷ್ಮೀಕಾಂತ ಇಟ್ನಾಳ
ಭೇಟಿಯಾದವು ಹಳೆಯ ಹಲ ನೆನಪುಗಳು ಸಂಜೆ
ಮರೆತ ಕೆಲ ಕನಸುಗಳ ಜೊತೆ ಮಾತಾಯಿತಂದೆ
ನೆನಪುಗಳ ಕೆದಕಿದೆವು ಕಣ್ಣಾದವು ಮಂಜು
ಆರಂಭ ಅಂತ್ಯದಲಿ ನಿನ್ನ ನೆನಪೇ ಬಂದು

ಕನಸೊಂದು ನೆನಪುಗಳ ಕೌದಿಯನು ನೇಯಲು
ನೆನಪುಗಳ ಜೋಡಿಸಲು ಕನಸುಗಳೇ ದಾರ
ನೆನಪೊಂದು ನಿದ್ದೆಯಲಿ ಕನಸೊಂದು ಕಂಡಿರಲು
ಸುರಿದಿಹುದು  ಕನಸುಗಳ ವರ್ಷಧಾರೆ

ನೆನಪೊಂದು ಹೇಳಿತು ಎಲ್ಲ ಬದಲಾದಹಾಗಿದೆ
ಮೊದಲಿನಾ ಗೆಳೆತನ  ಮರೆಯಾದಹಾಗಿದೆ
ನೆನಪೇ ಇಲ್ಲೀಗ ಕನಸು ಬೀಳುವುದೇ ಇಲ್ಲ
ನೆನಪುಗಳು ಉರಿಯುತ್ತ  ಉಳಿಯುವುದೇ ಎಲ್ಲ

ನೆನಪುಗಳ ಕನಸುಗಳ ಸುಟ್ಟು  ಹೊರಬಂದು
ಬದುಕಿಹೆವು ಒಂದೊಂದು  ಹುತ್ತದಲಿ ನಾವೆಲ್ಲ
ಸಂಕುಚಿತ ಮನಸಲ್ಲಿ ಕಹಿಯಾದ ಬದುಕಲ್ಲಿ
ನಾನು ನಾನಾಗಿಲ್ಲ ಅವನು ಅವನಾಗಿಲ್ಲ

ಭೇಟಿಯಾದವು ಹಳೆಯ ಹಲ ನೆನಪುಗಳು ಸಂಜೆ
ಮರೆತ ಕೆಲ ಕನಸುಗಳ ಜೊತೆ ಮಾತಾಯಿತಂದೆ
ನೆನಪುಗಳ ಕೆದಕಿದೆವು ಕಣ್ಣಾದವು ಮಂಜು
ಆರಂಭ ಅಂತ್ಯದಲಿ ನಿನ್ನ ನೆನಪೇ ಬಂದು