ಪಾರಿಜಾತ

೧

ಶಿಲೆ ದೇವರ 

ತಲೆಯ ಮೇಲೆ 

ಪುಟ್ಟ ಪಾರಿಜಾತ

ಮಾಡುತ್ತಿದೆ ತಪ! 

೨

ಅಭಿಷೇಕಗೊಂಡ

ವಿಗ್ರಹ ತಂಪಾಗಿದೆ

ಶಿರವೇರಿದ ಪಾರಿಜಾತ

ಬಾಡದು ಬೇಗದೆ 

೩

ವಿಗ್ರಹ ಕಲ್ಲಿನದು 

ಎಂದು ಹೇಳುವಾಗ ಅರ್ಚಕ,

ತನ್ನ ಎಸಳ ಮೃದುವಿಗೆ 

ಬೇಸರಿಸಿತಾ ಪಾರಿಜಾತ!

೪

ಭಕ್ತನುಡಿದ

"ಸಾವಿರ ವರ್ಷದ ವಿಗ್ರಹ

ಇಂದಿಗೂ ಹೊಳೆಯುತ್ತಿದೆ, ಆಹಾ!"

ಪಾರಿಜಾತ ನಿರ್ಮಾಲ್ಯವಾಗುವ

ಸಮಯವಾಗಿತ್ತು ಆಗ

೫

ಭಕ್ತನ ಕೈಗೆ

ಜಾರುವಾಗ ಪಾರಿಜಾತ

ನೆಲದ ಮೇಲೆ 

ಒಣಗುವ ಸುಖಕ್ಕೇ ಆಸೆಪಟ್ಟಿತ!?

೬



ಹಕ್ಕಿ ಕೊರಳು 

ಪಾರಿಜಾತದ ಅರಳು

ಸುಸ್ವರಕ್ಕೆ ಪರಿಮಳ

ದ ಮೆರುಗು

ಶುಭ್ರ ಬೆಳಗು

೭

ಮುಂಜಾನೆ ಫಳಫಳಿಸಿದ

ಮಂಜು ಹನಿಗೆ ಅವಸರ,

ಪಾರಿಜಾತಕ್ಕೆ 

ನಶ್ವರದ ಪಾಠ 

ಹೇಳುವ ತವಕ

‌                  - ಅನಂತ ರಮೇಶ್