೧

 

ಅವಳು ಉಕ್ಕಿ ಹರಿಸಿದ ನಗುವಿಗೆ

ಅವನು ಬೊಗಸೆ

 

೨

 

ಬೆಳಗಿನ ಬಿಸಿ ಕಾಫಿ 

ನಿನಗೆ ಬಹಳವೇ ಇಷ್ಟ! 

ಹಬೆಯಾಡುವುದ ಕೊಡುತ್ತಾ ಅಂದ

ನಿನ್ನ ಬಿಸಿಯುಸಿರಷ್ಟು ಅಲ್ಲ ಅಂದಳು

 

೩

 

ಅವನು ಲಲ್ಲೆ ಮಾತು ಬಿಡಲೊಲ್ಲ

ಅವಳು ಪಲ್ಲಂಗ ತೊರೆಯಳು

 

೪

 

ಏಕಿಷ್ಟು ಪಲ್ಲಂಗ ಮೋಹ ಅವಳಿಗೆ?

ಅವನ ಸರಸ ಅರಳುವುದು 

ಘಮ ಘಮಿಸುವುದು

ಅಲ್ಲೆ ಅಲ್ಲವೆ!

 

೫

 

ನಲ್ಲೆ ಬೆನ್ನ ತೋರಿದಳು

ಅವನೋ ಬೆನ್ನು ಬಿಡ

 

೬

 

ನಲ್ಲನಿಗೆ ಬೆನ್ನಾದಳು

ಬಲ್ಲವಳು ಅವಳು 

ಹೊನ್ನಾದಳು

 

೭

 

ಹುಸಿ ಕೋಪದಲ್ಲಿ

ಒಲವು ಹಸಿರಾಗಿದೆ

 

೮

 

ಹೊರಗೆ ಬಿಸಿಲು 

ಹಗುರ ಮಳೆ

ನಲ್ಲೆಯ ಹುಸಿಕೋಪ 

ನಸು ನಗೆ

 

‌                  - ಅನಂತ ರಮೇಶ್